«Ақтөбе РГС» ЖШС мен «АрселорМиттал Теміртау» АҚ компанияның металлургия комбинатына тауарлық газ жеткізу туралы өзара келісім жасасты. Аталған келісім Энергетика министрлігі, «ҚазТрансГаз» ҰК» АҚ және «АрселорМиттал Теміртау» АҚ арасында қол қойылған ынтымақтастық жөніндегі меморандум шеңберінде жүзеге асты.
Газ жеткізу көлемі жылына 300 млн текше метрден 600 млн текше метрді құрайды, өзара келісімнің мерзімі кемі – 15 жыл.
Келісімге қол қою рәсіміне «АрселорМиттал Теміртау» АҚ бас директоры Биджу Наир және «Ақтөбе-РГС» ЖШС директоры Нұргүл Кактаева қатысты.
«Металлургия комбинатын табиғи газға ауыстыру секілді компания қолға алған экологиялық шаралардың басты мақсаты – қоршаған ортаға зиянды шығарындылар көлемін азайту және осы арқылы комбинатты батыс еуропалық өнеркәсіптік кәсіпорындар деңгейіне көтеру. Оның «Сарыарқа» магистральдық газ құбырына қосылуы экологияға да игі әсерін тигізеді. Айналаны ластайтын негізінен энергетикалық көмір, мазут сынды отын түрлері екені белгілі. Компания қоршаған ортаға пайдасы көп осындай көптеген жобаларды жүзеге асыруды жоспарлап отыр. Мұндай экологиялық іс-шаралар зиянды қалдықтар көлемін төмендетуге мүмкіндік береді», деп атап өтті «АрселорМиттал Теміртау» АҚ бас директоры Б.Наир.
Естеріңізге сала кетейік, биыл Қазақстан Үкіметі мен «АрселорМиттал Теміртау» өзара түсіністік туралы меморандумға қол қойды. Құжатта көрсетілген шарттар бойынша «АрселорМиттал Теміртау» АҚ зиянды шығарындылар мәселелерін шешумен қатар, өндірісті жаңғыртуға бағытталған инвестициялар қатарын арттыруға мүдделі. Инвестициялық келісімшарт шеңберіндегі жиынтық көлем алдағы он жыл ішінде кемінде 3 млрд долларды құрайды. Бұл соманың басым бөлігі келісімнің алғашқы бес жылында инвестицияланбақ.