Түркістан қаласының полицейлері 14 пәтер ұрлығына қатысы бар күдіктіні ұстады, деп хабарлайды Egemen.kz.
Polisia.kz мәліметінше, Түркістан ҚПБ-ға жергілікті тұрғын пәтер ұрлығы туралы арызданған. Жәбірленушінің айтуынша, оның үйіне терезе арқылы белгісіз біреу кіріп, құны 100 мың теңге тұратын тігін машинасын ұрлап кеткен. Аталған жайт ҚР ҚК-нің 188-бабы (Ұрлық) бойынша тіркелген.
Ұрлықты ашу мақсатында түркістандық тәжірибелі полиция қызметкерлерінен жедел-тергеу тобы құрылды. Жедел уәкілдер қажетті іс-шаралар кешенін жүргізіп, жақын маңдағы аумақтарды аралап, куәлардан сұрастырды, сондай-ақ бейнебақылау камераларын тексерді.
Біршама уақыттан кейін жедел-іздестіру іс-шарасы нәтижесінде Түркістан ҚПБ-ның қызметкерлері күдікті ретінде жергілікті тұрғынды құрықтады. Тергеу барысында күдіктінің осындай 14 пәтер ұрлығын жасағаны анықталды. Қолды болған заттардың барлығы айғақты зат ретінде тәркіленіп алынып, заңды иелеріне қайтарылды.
Қазіргі уақытта аталған жайттар бойынша сотқа дейінгі тергеу амалдары жүргізіліп, қылмыстық іс айыптау актісімен сотқа жолданды. Күдікті қамауға алынды.
Өз кезегінде, Түркістан облысының полицейлері азаматтарға сақ болу керектігін және өз үйлерін қараусыз қалдырмау қажеттігін ескертеді.