Ә.Қастеев атындағы өнер музейінде белгілі мүсінші, Қазақстанның еңбек сіңірген өнер қайраткері, Қазақ КСР Мемлекеттік сыйлығының лауреаты, профессор Ескен Сергебаевтың «Тәуелсіздік – тұғырым» атты жеке көрмесі ашылды. Айшықты жоба шебердің туғанына 80 жыл толуына және ел Тәуелсіздігінің 30 жылдығына арналып отыр.
Көрме кейіпкері, ең алдымен, бейненің эпикалық күші өмірдің өтпелі сәттерінің романтикалық сезімдерімен үйлесетін монументалды жұмыстарымен танымал. Біздің көңілімізге қатталған Әуезов бейнесі, әл-Фараби мен Абай тұлғасы, Т.Жүргенов ескерткіші Сергебаев қолтаңбасын әйгілеген төл туындылар. Қондырғылы пластика саласында өнімді еңбек еткен оның шығармашылық жолы өмірін өнермен өргісі келгендерге айнымас үлгі.
Мүсіншінің белсенді шығармашылық қызметі 60-жылдары, қазіргі заманның қажеттіліктеріне жауап беретін, бойына образдың астарлы мәнін, эпикасы мен аллегориясын біріктіретін жаңа көркемдік стильді қалыптастыруды мақсат еткен, кеңестік өнерге талантты суретшілер мен мүсіншілердің жаңа буыны келген кезде басталды. Е.Сергебаевтың ертеректегі «С.Айтбаевтың портреті» (1967), «Абай» (1968), «Замандастың портреті» (1972) композициялары формасының жалпылығымен, сұлбаның орнықтылығымен және тұтастығымен, ішкі энергетикасымен және автордың зымыраған уақыт сезімін, әкелер мен балалар арасындағы рухани сабақтастықтың маңыздылығын жеткізуге ұмтылысымен ерекшеленеді. 80-жылдардағы еңбектерінде шебер монументалды стильге, өткен мен бүгінді философиялық пайымдауға бет бұрады.
Ескен Сергебаев 1940 жылы 19 мамырда Алматыда дүниеге келді. Н.Гоголь атындағы көркемсурет училищесінде Н.Журавлевтен тәлім алды. 1969 жылы И.Репин атындағы Ленинград кескіндеме, мүсін және сәулет институтының мүсін факультетін бітірді. 1960 жылдан Қазақ КСР Көркемсурет қорында жұмыс істеді, ал 1974 жылдан «Өнер» көркемсурет комбинатында бас суретші болды.
Көркемөнер академиясының толық мүшесі Е.Сергебаев оқытушылық қызметті белсенді атқарып келеді. 1969 жылдан бастап Н.Гоголь атындағы Алматы көркемсурет училищесінде, ал 1978 жылдан Театр және көркемсурет институтында оқытушы, кейіннен доцент болып жұмыс істеді. 2010 жылдан бастап қазіргі уақытқа дейін Е.Сергебаев Т.Жүргенов атындағы Қазақ ұлттық өнер академиясында мүсін кафедрасының меңгерушісі, профессоры қызметін атқарады.
Экспозицияға автордың Ә.Қастеев атындағы өнер музейі қорында және өз шеберханасында сақталған әр жылдардағы 70 шығармасы еніп отыр. Тәуелсіздік тойына арналған рухани жоба желтоқсан айының ортасына дейін жалғасады.
АЛМАТЫ