Қазақстанда медициналық көмектің қолжетімділігін қамтамасыз ету мақсатында 2021 жылы еліміздің өңірлерінде 109 амбулаториялық-емханалық нысанның құрылысы басталды, деп хабарлайды Egemen.kz.
Бұл туралы Денсаулық сақтау министрлігінің баспасөз қызметі мәлімдеді.
Жалпы, бүгінгі таңда халыққа медициналық қызметтерді 7 мыңнан астам амбулаториялық-емханалық ұйым көрсетеді, оның ішінде мемлекеттік 59%, жеке меншік - 41%.
Жалпы практика дәрігерлерінің 12 мыңнан астам учаскесі ашылды. Қант диабеті, гипертония және созылмалы жүрек жеткіліксіздігі бойынша ауруларды басқару бағдарламасын іске асыру жалғасуда.
Бұл бағдарламаға динамикалық бақылаудағы пациенттердің 55%-ы қатысады. Қазіргі уақытта алғашқы медициналық-санитарлық көмекті қаржыландыру денсаулық сақтауды қаржыландырудың жалпы көлемінің 52,4%-на дейін жеткізілді. Бұл көрсеткіш 60%-ға дейін жеткізіледі.
Осылайша, қымбат стационарлық емдеуден аурулардың алдын алуға көшу жүзеге асырылады.