Біріккен Араб Әмірліктерінің Дубай қаласында футболшылардың 2021 жылғы маусымы қорытындыланып, дәстүрлі Globe Soccer Awards сыйлығын тапсыру рәсімі өтті.
Салтанатты шарада түрлі аталымдар бойынша тағайындалған сыйлықтардың иегерлері мыналар: «Ең үздік ұлттық команда» – Италия құрамасы, «Ең үздік клуб» – Лондонның «Челсиі», «Жылдың ең үздік қорғаушысы» – Леонардо Бонуччи («Ювентус», Турин), «Жылдың ең үздік ойыншысы» – Килиан Мбаппе (ПСЖ, Париж), «Жылдың ең үздік сұрмергені» – Роберт Левандовский («Бавария», Мюнхен) және «Жылдың ең үздік бапкері» – Роберто Манчини (Италия құрамасы).
Ал осы әлемге әйгілі тұлғалар арасынан ең үлкен марапатқа Криштиану Роналду ие болды. Португалия ұлттық құрамасы мен Англияның «Манчестер Юнайтед» клубының жұлдызы «Футбол тарихындағы ең үздік сұрмерген» деген арнайы атаққа ие болды.