Қазақстандық домбырашылар Темірлан Олжабай мен Ернат Наурыз Испанияда өткен Music Box халықаралық байқауында «Аспаптық музыка» номинациясын жеңіп алды.
Онлайн режімдегі байқау екі кезеңмен өтті. Қазақ домбырашылары бірінші кезеңнен сәтті өтіп, авторлық өңдеуде Никколо Паганинидің «Каприс №24» туындысын орындады. Ал екінші кезеңде «Игра престолов» телехикаясының саундтрегін орындап, конкурстық бейнеролик түсірді. Аталымға 36 елдің аспапшылары қатысқан. Ең жоғары ұпайды қазақстандықтар жеңіп алды.
Музыканттар жүлде орнына ұйымдастырушылар есебінен мамыр айында Испанияда өтетін офлайн фестивальға жолдама алды, сондай-ақ белгілі музыка сарапшыларының шеберлік сабағына жеке қатысады.
Домбырашылар Қазақ ұлттық өнер академиясында оқып жүргенде танысып, 2017 жылы дуэт құруға бел буған. Олар I’m a Singer байқауында Димаш Құдайбергенмен бірге өнер көрсеткеннен кейін танымал бола бастады. Мәдениет және спорт министрлігі Токиодағы Олимпиадада домбырашыларды Қазақстанның мәдениет амбассадорлары етіп тағайындаған болатын.
Темірлан Олжабай мен Ернат Наурыз бұған дейін «Үздік аспаптық дуэт» номинациясы бойынша Bridge TV жүлдесін жеңіп алған, Golden Time Talent халықаралық фестивалінде бірінші орынды иеленді. Сонымен қатар Испанияда өткен Costa Brava Music фестиваліне қатысқан.