Президент Қасым-Жомарт Тоқаевтың билеуші партияның жаңа Төрағасы ретіндегі сөзі елдегі өзгерістердің жүйелі әрі сапалы түрде жүретінін байқатты.
Демократиялық дәстүрлері мен тәжірибесі әлі пісіп-жетілмеген орта үшін бәлкім жалғыз да оңтайлы жол осы. Айналып келгенде популизмге салынып, «битке – өкпелеп, тонды отқа тастай салу» оңайдың оңайы. Ал барымызды сақтай отырып, орын алған қателіктерді түзету – жауапты саясаттың көрінісі. Атап айтқанда, Мемлекет басшысы өткен жылғы сайлауда партия халықтың білдірген сенімін жеткілікті дәрежеде ақтай алмады, салдарынан әлеуметтік-экономикалық ахуалдың нашарлауына жол берді деді. Сайлауалды бағдарламаның іске асырылуы көпшілік жағдайда көңіл көншітпейді. Мұның соңы қоғамдағы наразылықтың күшеюіне алып келді. Праймеризді жүргізіп партияның іштей жаңарғаны, өкінішке қарай, елдегі қордаланған түйткілдерді еңсеруге әлі жетпеді. Сондықтан басты мақсат орын алған кемшіліктерді шынайылықпен мойындап, халықтың мүддесін қорғау тұрғысында кадрлық тағайындаулармен қатар нақты тапсырмалар берілді. Жаңа Төрағаның сөз бен істің сабақтастығына ерекше мән беретінін ескерсек, алдағы уақытта партияның жұмысына жан бітеді деген үміт зор.
Расул ЖҰМАЛЫ,
саясаттанушы