Біз импортқа тәуелдіміз

Көлік индустриясы да импортқа тәуелді. Мысалы, Hyundai Accent 2011 жылы 15 мың доллар еді, қазір де осы бағада. Бірақ үш жыл бұрынғы теңге бағамы мен қазіргі бағаны салыстыруға бол­майды. Бірақ импортқа, импорт дол­ларға тәуелді болған соң амал жоқ. Заман көші алға жылжыған сайын тех­н­ология да жаңарып жатыр. Көлік­тің тех­но­логиялық жағынан жарақтан­дыры­луы бірінші кезекте бағасына әсер етеді.

Соңғы үш жылда логистика 3,5 мың доллардан 11,7 мың долларға дейін қымбаттады. Жаңа тасымалдау­шылармен келісімшартқа жақында ғана қол қойдық. Содан кейін тасымалдау бағыты да өзгерді. Бұрын Қытай арқылы тасымалдасақ, қазір Қиыр Шығыс арқылы алып келуге мәжбүрміз. Қытай арқылы 30 күнде жетсе, жаңа бағытқа 45-60 күнді жоғалтамыз. Баға ең алдымен локализацияға, нарықтағы сұранысқа тәуелді. Айналымға шыққан көліктердің саны көбейген сайын оның өзіндік құны арзандайды. Бізде бұл мүмкін емес.

Ресейде 1 мың адамның 300-інде көлік бар. Ал Қазақстанда 1 мыңға шаққанда 200 адам көлік тізгіндеген. Соның 7-8 пайызы ғана көлікті салоннан сатып алады. Қалғандары сырттан келетін ескі көліктерді алғанды тәуір көреді. Демек қазақстандықтардың көлікке деген қажеттілігін ескі-құсқы болса да импорт қанағаттандырып отыр. Ал импорт көлік неге арзан деген мәселеге келсек, оған да жауап дайын. Елімізде 3,5 млн-нан астам жеңіл авто­көліктің 12 пайызы ғана жеті жыл бұрын зауыттан шыққан. Қалғаны ескі. 20-30 жылдан асып кеткен көліктер бізде жетіп-артылады. Ал дамыған елдерде автокөліктердің ескісін өткізеді, жояды. Көзін тапқандары – дамушы елдерге асырып жібереді.

Біздегі жағдайды олармен салыс­тыруға тіптен келмейді. Қысқасы, Қазақ­стан ескі көліктердің мұражайына ай­нал­ды. Көлікті 100 пайыз өзімізде құ­рас­тыр­сақ, баға арзандап кетеді деу қисын­сыз. Бәрі локализацияға байланысты.

Дегенмен көлік бағасын арзандататын мүмкіндіктердің бәрін қарас­тырып жатыр­мыз. Біз бірінші кезеңде дәнекер­леу, сырлау, екінші кезеңде тағы бір үлгіні меңгеруді жоспарлап отырмыз. Осы жобаны жүзеге асыру үшін Hyundai Motor ком­паниясымен келіссөздер жүріп жатыр.

Қазақстанда да, Ресейде де көлік бағасы доллар бағамына тәуелді. Қазір ел ішінде делдал компаниялар туралы әң­гіме көп. Ортадағы делдалдар баға фак­торына әсер ете ме деген мәселе бізге де жұм­бақ. Бірақ заңмен шектемеген соң олар­дың жұмысын тоқтату мүмкін емес. Мысалы, үйді сатқан кезде оны бір жыл­дың ішінде келесі адамға сатпау туралы шарт бар. Ал автокөліктерге қатысты ондай шарт жоқ. Сол себепті зауытқа келіп, көлік алып, оған 10 пайыздық үстеме баға қосып сатып жүргендер жайлы жиі естиміз. Заңда қаралмаған соң олардың жұмысын шектеу мүмкін емес. Біз делдал компаниялармен жұмыс істеуге мүдделі емес екенімізді тағы да айтқым келеді. Қазір Қазақстанның кез келген адамына салонға келіп, автокөлікті өз бағасына алуына мүмкіндік бар.

Бекнұр НЕСІПБАЕВ,

«Астана Моторс» бас директоры