Беларусь Республикасында ел Конституциясын өзгерту туралы референдум өткені белгілі. Соған сәйкес Беларусь халқы ядролық қарусыз ел мәртебесінен бас тартуға дауыс берді.
Беларусь Орталық сайлау комиссиясы референдумда сайлаушылар тізіміне енген азаматтардың 78 пайызы дауыс бергенін хабарлады.
Дауыс беру бюллетенінде бір ғана сұрақ болды: «Сіз Беларусь Республикасының Конституциясына енгізілген өзгерістер мен толықтыруларға келісесіз бе?».
Беларусь Орталық сайлау комиссиясы елдің Конституциясын өзгертуді сайлаушылардың шамамен 65 пайызы қолдағанын, ал 10 пайызы бұл өзгеріске қарсы дауыс бергенін хабарлады.
Конституцияға енгізілген өзгеріс бойынша А.Лукашенконы қылмыстық қудалауға рұқсат берілмейді және оның одан әрі президент сайлауына түсіп, елді басқаруын жалғастыруға мүмкіндік береді. Яғни түзетуге сәйкес ол президент ретінде жасаған әрекеттері мен шешімдері үшін жауапқа тартылмайды. А.Лукашенко сонымен бірге Беларусь парламентінің жоғарғы палатасының тұрақты мүшесі болады.
Беларусь халқы, сондай-ақ референдум арқылы ядролық қарусыз ел болудан бас тартты. Кеңес Одағы ыдырағаннан кейін алғаш рет Беларусь жеріне ядролық қарулар қайта орналастырылуы мүмкін.
Батыс елдері Беларусь үкіметінің ішкі қарсыластарына қарсы ұйымдастырған жаппай қуғын-сүргінмен қатар өткізілген референдумының нәтижелерін мойындамайтынын мәлімдеді. Жалпы, референдумның Ресейдің Украина аумағына басып кіруімен қатар өткені халықаралық қоғамдастықтың назарын аудартқаны рас.
Украинаның солтүстігінен кірген әскер Беларусь шекарасынан келгені туралы ақпарат бар. А.Лукашенконың бұл әрекетін құптамаған Батыс елдерінің өкілдері Ресеймен қатар, Беларуське де санкция салынуы керек деген пікір білдірді. Бірқатар беларусь шенеунігіне қарсы санкцияларды Ұлыбритания жариялай бастады. Одан бөлек мемлекет басқаратын қаржы ұйымдары мен банктер де нысанаға алынған.
Еуроодақ та бұл қадамнан қалыс қалмады. Сәрсенбіде Францияның ЕО төрағалығы санкциялар беларусь шенеуніктері мен ЕО-ның Ресейдің Украинаға қарсы агрессиясына қатысы бар әскери қызметкерлерге бағытталғанын мәлімдеді. Одан бөлек Беларусь экономикасының белгілі бір салалары, атап айтқанда ағаш өңдеу, металлургия және басқа өндіріс орындары шектеуге іліккен.
Осылайша, көршілес Украинадағы ірі дағдарыс кезінде өткен Беларусь референдумы ел Конституциясына бірқатар түзету енгізуге мүмкіндік берді.