«Энергия» үйлестіру диспетчерлік орталығының арнайы комиссиясы 2022 жылғы 25 қаңтарда болған апатқа қатысты тергеу-тексеру жұмыстарын аяқтады. Оның құрамына Орталық Азияның, атап айтқанда Қазақстан, Өзбекстан, Қырғызстанның энергия жүйелері жүйелік операторларының өкілдері кірген болатын. Бұл туралы KEGOC АҚ хабарлады.
Комиссия апаттың себебін Өзбекстанның энергия жүйесінде болған ажыратылудан туындағанын анықтады. Осы күні Нұр-Сұлтан уақыты бойынша сағат 11:59-да Сырдария ЖЭС-і мен 500 кВ «Ташкент» ҚС-ны (Өзбекстан) қосатын 500 кВ жоғары вольтті әуе электр жеткізу желісінің желілік ажыратқышында қысқа тұйықталу орын алды. 500 кВ шиналардың 1-ші және 2-ші жүйелерінің дифференциалды қорғаныстарының шамадан тыс жұмыс істеуі Сырдария ЖЭС-інде генерацияның айтарлықтай төмендеуіне, электр стансасына іргелес электр желісіндегі ажыратылуларға және Қазақстанның Біртұтас электр энергетикалық жүйесінің (БЭЖ) 500 кВ Солтүстік-Шығыс-Оңтүстік транзитіне 2 100 МВт мөлшеріндегі қуат жүктемеден тыс түсірілуіне (белгіленген нормадан 7 есе жоғары) әкелді.
Жүйелі апаттар кезінде KEGOC АҚ электр желілері мен Қазақстанның оңтүстігіндегі электр стансаларының аварияға қарсы автоматикасы энергия жүйесін бөлу жөніндегі талаптарды ескере отырып, штаттық режімде іске қосылды. Осы арқылы еліміздің оңтүстік тұтынушыларының шамамен 60%-ын электрмен жабдықтауды сақтай отырып, Қазақстанның оңтүстік аймағы тұтынушыларының толық ажыратылуына жол берілмеді. Бұл ретте Өзбекстан мен Қырғызстанның энергия жүйелері толығымен тоқтан ажыратылды.
KEGOC компаниясына апатты жоюға және Қазақстандағы барлық тұтынушыларға қойылған шектеулерді алып тастауға 4 сағат қажет болғанын, сондай-ақ бұған Қазақстан БЭЖ-і Жүйелік операторы персоналының жоғары кәсіби шеберлігінің нәтижесінде қол жеткізгенін атап өткен жөн. Ал Қырғызстан ҰЭТ-те схема мен режім бір тәуліктен астам уақыттан кейін қалпына келтірілсе, Өзбекстан ҰЭТ-те тұтынушыларды энергиямен жабдықтауды қалпына келтіру төрт күнге созылды.