Қазақстандық теннисшілер Андрей Голубев пен Григорий Ломакин әлемдік рейтингте жеке рекордтық нәтижеге қол жеткізді, деп хабарлайды Egemen.kz.
Қазақстан теннис федерациясы мәлім еткендей, Андрей Голубев жұптық сында 24-орынға көтерілді. Ол спорттық жолында мұндай сатыға жоғарылап көрмеген еді.
Тағы бір қазақстандық, өткен аптада жұптық сында Колумбиядағы турнирдің финалына дейін жеткен Григорий Ломакин бірден 48 сатыны артта қалдырды. Ол қазір 265-сатыда.
Қазақстанның бірінші ракеткасы Александр Бублик жекелей сында 37-нші, Михаил Кукушкин 160-орында келеді. Дмитрий Попко 175-тен 169-ға көтерілді. Тимофей Скатов – 193-інші, Денис Евсеев – 341-інші, Бейбіт Жукаев 509-сатыда тұр.
Қазақстанның әйелдер арасындағы бірінші ракеткасы Елена Рыбакина 18-орында қалса, Юлия Путинцева 47-ден 46-ға ауысты. Зарина Дияс 112-ден 113-ке сырғыды. Жұптық сында Анна Данилина 21-інші, Жібек Құламбаева 302-орында келеді.