Түркістан облысы, Келес ауданы, Біртілек ауылдық округінде орналасқан №9 Көлтоған жалпы орта мектебінің 11-сынып оқушысы Жанерке Зейлбекова Америка Құрама Штаттарының 8 университетінен грант ұтып алды.
Ағылшын тілін терең меңгеріп, Назарбаев университетіне түсуге дайындалып жүрген Жанерке онлайн түрде оқу курстарынан өтіп, шетелдегі байқауларға да қатысқан. Нәтижесінде, АҚШ мемлекетінің 8 университетінен шақырту алды. Бүгінде Түркия мемлекетінің жоғары оқу орындарына да құжаттарын тапсырып, нәтижесін күтіп отырған білімді жас осындай жоғары нәтижеге жетуіне басты себепкер болған мектебінің ұстаздарына дән риза. «Жанерке карантинде мектеп қашықтан оқу форматына ауысқан кезде уақытын босқа өткізбей, ағылшын тілінен қосымша сабақтарға қатысып жүрді. Репетитордан онлайн дәріс алды. Ешқандай гимназия, лицей емес, жалпы білім беретін мектепте оқиды. Бостон, Нью-Йорк, Чикаго қалаларында орналасқан жоғары оқу орындарынан шақырту келді. Бүкіл ауыл қатты қуанып жатырмыз», дейді мектеп директоры Қалдыгүл Тұрсынбекова.
Түркиядағы университетке құжат тапсырған Жанерке болашақта дәрігер болғысы келеді.
Түркістан облысы