Қазақстан Президенті Қасым-Жомарт Тоқаевтың ауқымды реформаларға толы Жолдауымен танысып шықтым. Қазақстанның нағыз досы ретінде Президент қолға алған барлық бастамаларды құптаймын. Қасым-Жомарт Тоқаевтың өзі бастамашыл болған барлық реформаны жүйелі түрде жүзеге асыратынына және Қазақстанның Корея Республикасы сияқты әлеуметтік дамуға қол жеткізетініне сенімім мол.
Біз реформалардың ауқымы кең екенін және олардың мемлекеттік басқарудың барлық бағытын қамтитынын көріп отырмыз. Мұндай реформалардың толыққанды жоспарын жасау оңай шаруа емес, ал сол реформаларды түсіну процесі одан да қиын. Үкіметтің халық алдындағы міндеттемелерінің жауапкершілігі зор болғандықтан, билік қоғамда қалыптасқан қарсылық психологиясын жеңу үшін қолдан келгеннің бәрін жасауы керек. Ал халық Президент бастамаларын қолдауы, шыдамдылық танытуы тиіс.
Бүгінде экономикалық даму мен демократияға қол жеткізген Корея Республикасының қазіргі тарихына көз жүгірте отырып, Үкіметтің уәделерін орындаудың, сондай-ақ халықтың түсінуі мен қатысуының маңыздылығын атап өткім келеді.
Үкімет пен халық реформалар жоспарын іске асыру процесінде туындайтын мәселелердің орындалуы кезінде шыдамсыздық танытпайды, керісінше ұзақ мерзімді перспективаға үміт арта отырып, барлық қажетті іс-шараларды қабылдайды деп үміттенемін. Сонда ғана реформалардың қозғаушы күші сақталып, мүмкін болатын құрбандық пен шығын көлемі азаяды.
Қазақстан халқы мен Үкіметіне қазір бағаның өсуі өз ауыртпалығын тигізіп отырғаны анық. Алайда бұл мемлекеттің жетілуі кезінде жүріп өтетін жолы, процесі екенін ұмытпау керек.
Корея Республикасы да мұндай өткір мәселелермен бетпе-бет кездескен. Өзекті проблемаларды еңсерген. Еліміз тынымсыз атқарылған жұмыстар мен реформалардың арқасында бүгінгі прогреске қол жеткізді. Қазақстанның да барлық қиындықтарды жеңіп шығатынына бек сенімдімін.
Қазақстан коронавирус індетінің таралуын тежеп, белгілі бір деңгейде жеңіске жеткені мәлім. Жаһан жұртын әбігерге салған індетпен белсенді күрескен елдің қазіргі саяси-әлеуметтік мәселелерді де еңсере алатыны даусыз.
Қазақстан тәуелсіздік алғаннан кейін Орталық Азиядағы ең ірі дамушы ел болды. Бұл Қазақстан Үкіметі мен халқының бірлігінің, берекелі тірлігінің белгісі деп білемін. Бұл жолы Қазақстан реформалар мен дамудың қозғаушы күшін алға екі қадам жасау мүмкіндігі ретінде пайдалана алатынына иланамын. Қысқасы, мемлекеттің жүйелі жұмыстар арқылы табысқа жететіні даусыз.
Ким Дэ СИК,
Корея Республикасы Губернаторлары қауымдастығы Халықаралық қатынастар департаментінің бас директоры