Тұлға тойы Тараздан бастау алды

Кездесу барысында Жам­был облысының әкімі Нұржан Нұржігітовпен бірге қазақтың тұңғыш театр режиссері Асқар Тоқ­пановтың ескерткішіне гүл шоқ­та­рын қойды. Сондай-ақ келу­шілер­мен бірге театрдың фойе­сінде ұйымдастырылған Асанәлі Әші­мов музейін та­ма­шала­ды. Айтулы тұлға өнер туралы, өнердегі дос­тары туралы ұмы­тыл­мас естеліктерімен де бөлісті.

Өнер иесінің мерейтойына орай Асқар Тоқпанов атын­дағы облыстық қазақ драма театрын­да Халық әртісінің шәкірт­тері­нен құралған «Жаңа ғасыр» театры­ның актерлері Бақыт Бе­дел­хан­ның «Тағдыр тақтасы» ат­ты по­этикалық дра­масын сахналады. Атал­ған қойы­лым Асанәлі Әшімов­тің қилы тағдыры мен шығарма­шылығына арналған. Сахнада қойылған шахмат тектес алаң үстінде шым-шытырық, қым-қиғаш тағдыр баяндала­ды. Қатар жүретін бақ пен сор, өкініш пен үміт сияқты дүниелер көрерменді абыз Асанәлі әлемімен жақын таныстырды. Сол шахматтың тақтасында Шәкен Айманов, Нұр­мұхан Жантөрин, Асқар Тоқ­панов, Әнуар Молдабеков, Ра­йымбек Сейтметов және өзге де көрнекті тұлғалардың бей­нелері асқақтап көрінді. Жал­пы, бұл драма тұлғаның күн­деліктері мен естелік жазбаларын қамтиды. Сондай-ақ мәң­гілік сағынышқа айналған зайыбы Майра Айманова, өмірден ерте кеткен қос ұлы Мәди мен Сағи Әшімов бейнелері де кө­рініс табады. Сахнадағы Асан­­әлі олармен мұңдасады, сырласады. Қойылымды белгілі режиссер Жұлдызбек Жұман­бай сахналаған. Ал қарапайым Асанәлі рөліндегі Қуаныш Құдайберген, актер Асанәлі рөліндегі Қасымбек Демеуов, Майра рөліндегі Наз­ерке Но­ғай­­баева сияқты актер­лердің ойын­дары да көпшілікті бейжай қалдырмады. Сағи мен Мәди рөлін сомдаған Мұх­тар Қосыбай мен Мадияр Жол­­дас­бек те талантты сахнашеберлері екенін танытты.

Бұдан кейін облыс әкімі Нұржан Нұржігітов Асанәлі Әші­мовті келе жатқан мерейтойымен құттықтап, актердің еліміздің рухани-мәдени өмі­ріне қосқан зор үлесін атап өтті. Сондай-ақ жамбылдық жұрт­шылық та біртуар тұлғаға деген ықыласын жеткізді.