Ауыл шаруашылығы вице-министрі Әбілхайыр Тамабектің айтуынша, биыл пайдаланылмай жатқан 5 млн гектар ауыл шаруашылығы жері мемлекет меншігіне қайтарылады, деп хабарлайды Egemen.kz.
«Министрліктің 2021 жылғы 26 шілдедегі №223 бұйрығымен «жаппай қауіп» ұғымын айқындау жөніндегі ұсынымдар бекітілді. Ал 2022 жылғы 4 мамырдағы №139 бұйрыққа сәйкес, «жаппай қауіп» аясында жалпы алаңы 5,8 млн гектарды құрайтын 1 901 шағын кәсіпкерлік субъектісіне қатысты жоспардан тыс тексеру жүргізіліп жатыр», деді Әбілхайыр Тамабек.
Вице-министрдің айтуынша, жер пайдаланушыларды экономикалық мәжбүрлеуге жағдай жасау үшін пайдаланылмайтын ауыл шаруашылығы жерлеріне салық ставкасы 10 еседен 20 есеге ұлғайтылды.
«Жоғарыда аталған шараларды ескере отырып, биыл 5 млн гектар пайдаланылмайтын ауыл шаруашылығы жерін мемлекетке қайтаруды жоспарлап отырмыз. Бұл ретте пайдаланылмайтын және заңнаманы бұзып берілген жерлерді алып қою - бір күннің жұмысы еместігін атап өтемін. Өйткені Конституцияның және Азаматтық кодекстің нормаларына сәйкес меншік құқығы қорғалған. Ал алып қою процесі тек сот арқылы жүзеге асады», деді ол.