Орта салмақтағы IBF және IBO нұсқалары бойынша әлем чемпионы Геннадий Головкин (42-1-1, 37 КО) мен супер орта салмақта әлемнің абсолютті чемпионы мексикалық Сауль «Канело» Альварес (57-2-2, 39 КО) қыркүйек айында үшінші жекпе-жектерін өткізетін болды. Бұл туралы алыптар айқасын тікелей эфирде көрсететін DAZN стриминг платформасы мен боксшылардың өздері әлеуметтік желідегі парақшаларында ресми түрде мәлімдеді.
Қазіргі уақытта жекпе-жектің нақты қай елде және қай қалада өтетіні белгісіз, дегенмен бірінші және екінші жекпе-жектер АҚШ-тың Лас-Вегас қаласындағы T-Mobile аренасында ұйымдастырылған болатын. Бокс мамандарының болжамынша, үшінші айқас та дәл осы Невада штатында өткізілуі мүмкін. Әзірге барша әлем жанкүйері көз тіккен бокс кеші АҚШ пен Канадада DAZN PPV жүйесі арқылы ақылы түрде көрсетілетіні белгілі болды. Сонымен қатар әлемнің басқа мемлекеттері DAZN платформасы арқылы тамашалай алады.
«Мен жылдың екінші жартысында да жанкүйерлеріме өзімнің ең үздік жекпе-жегімді көрсететініме өте қуаныштымын. Бұл айқаста алдыңғы екі жекпе-жектегідей ешқандай ерекшелік болмайды», деді Канело әлеуметтік желідегі парақшасында. Ал отандасымыз жанкүйерлерін 17 қыркүйектегі айқасқа шақырды. «Мен баршаңызды 17 қыркүйектегі жекпе-жекте күтемін», деді Головкин.
Еске сала кетейік, 2017 жылдың қыркүйегінде өткен алғашқы бәсекеде Альварес пен Головкиннің күштері тең түссе, 2018 жылдың мамырындағы қарымта жекпе-жекте мексикалық боксшы төрешілердің шешімімен жеңіске жеткен болатын.
2022 жылдың жартыжылдығында екі боксшы да бір-бір жекпе-жек өткізді: Отандасымыз Геннадий Головкин сәуір айында Жапонияда Риота Муратаны жеңсе, «Канело» мамыр айында Дмитрий Биволдан ұпай саны бойынша жеңіліп қалған-ды. Дегенмен мексикалық боксшы супер орта санаттағы абсолютті чемпион атағын сақтап қалды (76,2 кг-ға дейін), себебі бұл жекпе-жекте ол бір салмақ жоғары көтерілген болатын.
Айта кетейік, Альварес пен Головкиннің үшінші жекпе-жегі супер орта салмақта, яғни 76,2 килоға дейінгі салмақ дәрежесінде өтеді. Бұған дейінгі екі кездесуде боксшылар орта салмақта (72,6 кг) жұдырықтасқан болатын.