Жол апаты азаяр емес

– Өңірдегі жол-көлік апатының бір­неше себебін айтуға болады. Біріншіден, қарсы бағыттағы жолаққа шығу, екіншіден жаяу жүргіншілерді қағу, үшіншіден жол қиылыстарынан өту ережесін бұзу, төртіншіден жылдамдықты шамадан тыс асыру, бесіншіден, мас күйде рульге отыру. Облыс аумағында жыл басынан бері жылдамдықты шамадан тыс асырған 153 мыңнан, қарсы бағытқа шыққан 130-дан, жаяу жүргіншілерге жол бермеген 800-ден, жаяу жүргіншілерге арналған жолақтан өту кезінде 5 мыңнан астам құқық бұзушылық дерегі анықталып отыр, – дейді Е.Биғамбаев.

Оның айтуынша, жол-көлік оқиға­ларына Армения мен Грузия Республика­сы, Ресей Федерациясы секілді шетелдерде тіркелген көлік жүргізушілерінің де қатысы бар. Осындай темір тұлпарды тізгіндеген жүргізушілерге қатысты жол-көлік оқиғасынан 75 адам әртүрлі дене жарақатын алғаны тіркелген. Қазір Атырау облысының аумағында шетелде тіркелген 30 мыңға жуық көлік бар.

– Биылғы бес айда көлік руліне отыр­ған мас жүргізушілердің кесірінен 8 жол-көлік оқиғасы тіркелді. Салдарынан екі адам қаза тауып, 8 адам әртүрлі дене жарақатын алды. Патрульдік полиция қызметкерлері 300-ден астам мас жүргізушіні анықтап, әкімшілік жауапқа тартты. Оның 270-ге жуығы Атырау қала­сында ұсталды. Ал жасөспірімдер ұшы­раған 23 жол-көлік оқиғасынан 2 бала қаза тауып, 30 бала әртүрлі дене жарақатын алды, – деп мәлім етті Е.Биғамбаев.

Қазір облыс аумағынан өтетін жол­дар­да көлік ағыны көбейген. Бұл жүргізу­шілерден сақтықты қажет етеді. Мәсе­лен, республикалық маңызы бар Ақтөбе – Атырау – Ресей Федерациясының шека­расы бағытындағы жолмен 9 мың, Аты­рау – Орал жолымен 7 мың, «Доссор – Құл­сары – Бейнеу жолымен 9 мың, облыс­тық Атырау – Индер жолымен 5 мың авто­көлік өтеді. Өңірдегі тасжолдарда тәу­лік­тік көлік ағыны шамамен 9 мың­ды құрап отыр. Аталған жолдардың дең­гейі 3-санатқа жатқызылуына байланыс­ты тәулігіне 3 мың 500 көлікті өткізу көз­дел­ген.

– Бірақ бұл жолдармен тәулігіне шамамен 5 500 көлік өтетіні тіркеліп отыр. Осыған байланысты қала сыртындағы рес­публикалық, облыстық маңызы бар Ақ­төбе – Атырау – Ресей Федерациясының ше­к­арасы, Атырау – Орал, Атырау – Индер тасжо­лына жылдамдық өлшеуге арналған 3 «Кардон» стационарлық құрылғы орна­тыл­ды. Бұл жолдарға тағы осындай 14 құ­рылғы орнату жалғасып жатыр. Аты­рау қаласының аумағында 6 «Кар­дон» стационарлық жылдамдық өл­ше­гіш құрылғысы іске қосылды. Қала сыр­тындағы жолдарға автоматты бағдар­ламамен жабдықталған үш аяқты жылжы­малы құрылғыны пайдалану үшін мерді­гер мекемемен бірлескен жұмыстар қол­ға алынды, – дейді жергілікті полиция қыз­меті басқармасының бастығы.

Мұнайлы шаһар сыртындағы тасжол­дарға «Сергек» камералары орнатылады. Мұндай қадамға баруға адам өліміне соқтырған жол апатының көбеюі себеп болып отыр.

– Қоғамдық тәртіпті сақтау және жол қауіпсіздігін қамтамасыз ету мақсатында «Көркемтелеком» компаниясының қыз­мет­керлерімен «Сергек» камераларын орнату мәселесі талқыланды. Мақсат – Атырау облысы аумағында қылмыстар санын азайту, жол-көлік оқиғаларын алдын алу. «Көркем – Жайық» филиалы­мен жасалған келісімшартқа сәйкес Атырау қаласының аумағында 2020 жы­лы­ «Сергек» жүйесінің 2 748 камерасы орнатылды. Аталған құрылғылар қоғамдық тәртіпті сақтау мақсатында үй аулала­рында, адамдар көп шоғырланатын орын­дар мен жол қауіпсіздігін қамтамасыз ету үшін автокөлік жолдарының бойында, көше қиылыстарында жұмыс істеп тұр. Бұл камера­лар түрлі қылмысты болдырмау мен жол қауіпсіздігін сақтауға сеп­тігін тигізді, – дейді облыстық полиция департаменті бастығының орынбасары Руслан Садиров.

Енді қысқа мерзімде Атырау қаласында «Сергек» құрылғыларының санын арттыру, сондай-ақ шаһар сыртындағы рес­пуб­ликалық, облыстық маңызы басым жол­дар­ға орнату көзделген. Осыған бай­ланыс­ты республикалық Ақтөбе – Атырау – Ресей Фе­дерациясының шекарасы, Аты­рау – Орал, Доссор – Құлсары – Бейнеу және об­­­лыс­­тық маңызы бар Атырау – Индер, Ин­дер – Қарабау – Миялы – Сағыз бағы­тын­дағы тасжолдарға камера орнату мәсе­­лесі пы­сықталды. Жол бойындағы каме­ра­­лардың арақашықтығын да жиілету жоспарланған.

Атырау облысы