Шығыс Қазақстан облысында жылқыларға соғылған көлік жүргізушісі қаза тапты, деп хабарлайды Egemen.kz.
Облыстық полиция департаментінің мәліметінше, қайғылы оқиға 20 шілдеде сағат 04.20 шамасында Омбы-Майқапшағай тасжолының 484/837 шақырымында болған.
«Жарма ауданында Toyota Crown көлігінің жүргізушісі рөлге ие бола алмай, үш жылқыны қағып кеткен. Жол-көлік апаты салдарынан 21 жастағы жүргізуші оқиға орнында көз жұмды. Төрт жолаушы, оның ішінде 2 әйел, ер адам және бір жасар бала ауруханаға жеткізілді. Дәрігерлер ер адамды ауруханаға жатқызды, қалған зардап шеккендерге көмек көрсетілгеннен кейін үйлеріне шығарылды», делінген ПД хабарламасында.
Аталған дерек бойынша ҚР Қылмыстық кодексінің 345-бабының 3-бөлігі «Абайсызда адам өліміне әкеп соққан көлік құралдарын басқаратын адамның жол қозғалысы ережелерін бұзуы» бойынша сотқа дейінгі тергеу басталды.
Қазіргі уақытта сотқа дейінгі тергеу амалдары жүргізілуде, бірқатар сот-медициналық сараптама тағайындалды, оның қорытындысы бойынша процессуалдық шешім қабылданады.