«Зерде» холдингі неге таратылады?

Үкіметтің кеңейтілген отырысында Мемлекет басшысы Қасым-Жомарт Тоқаев «Зерде» холдин­гі­нің жұмы­сына күмән келтіріп, мә­се­лені жан-жақты қарастыруды тап­сырған. Іле Цифрлық даму, инно­вациялар және аэроғарыш өнер­кәсібі министрі Бағдат Мусин «Зерде» холдингін таратып жі­беру ұсынылатынын хабарлады. Ал жа­қында министрлік холдингке байланысты өздері­нің ресми ұстанымын жариялады. Ведомствоның баспасөз қызметінің хабарлауынша, «Зерде» холдингі объективті және субъективті себептерге байланысты ақпараттық коммуникациялық технология­лар саласын дамытудың толыққан­ды институты ретінде қалыптаса алма­ған. «Бүгінде «Зерде» хол­дин­гі дербес табыс әкелмейді және ­өз кезе­гінде «Электронды үкімет­­­тің» ақпараттық-коммуникациялық ин-­ фрақұрылымы операторының функ­­цияларын жүзеге асыруға мем­­­­лекеттен тапсырыстар алатын «Ұлт­тық ақпараттық технология­лар» АҚ-ның дивидендтері есе­бінен қаржыландырылады. Мұны ауди­торлық есептер де растайды», делін­ген хабарламада.

2021 жылдың қорытындысы бойын­ша «Зерде» холдингінің та­бысы «Элек­­тронды үкімет­тің» ақпараттық ком­му­ни­ка­ция инфрақұрылымы мен ақпарат­тан­дыру объектілерін зерттеу жұмыстары есебінен ұлғайған. Осы­лайша, жақсы табысқа қол жеткіз­генімен компания жыл­дың соңын­да қайтадан шығынға ұшыраған. Республикалық бюд­жеттің атқа­ры­луын бақылау жө­ніндегі есеп комитетінің есебінше холдингтің жинақ­талған шы­ғыны 7 млрд тең­гені құраған.

Қазіргі уақытта «Зерде» хол­дингінің құрылымында үш еншілес ұйым бар: Astana Hub технопар­кі, «Ұлттық ақпа­раттық технологиялар» және Qazin­no­vations ак­цио­нерлік қоғамдары. Хол­динг та­ра­тылғаннан кейін бұл енші­лес ұйымдар Цифрлық даму министр­лігімен және мемлекеттік органдармен тікелей жұмыс істейді.

«Бүгінде біздің алдымызда жаңа стратегиялық міндеттер мен цифр­лан­дыру қарқынын жедел­дету мәселесі тұр. Сонымен қатар ­ақпа­раттық ком­муни­кациялық тех­ноло­гиялар саласын басқарудың сапалы жаңа тетігін құруымыз қажет. Бұл ретте алдағы транс­формация корпоративтік басқару­дың хол­дингтік құрылымын таратуға қа­тысты екенін атап өтеміз және бұл өзге­­рістер «Зерде» холдингі­нің өнді­ріс­тік персоналына әсер ет­пейді», дейді министрлік өкілдері.

Аталған мемлекеттік орган «Зерде­нің» қолында болған «сер­вис­тік интегратор» функцияларын «Цифрлы үкі­метті қолдау ор­талығы» РМК-ға беру туралы ше­шім қабылдаған. Оның не­гізгі міндеттері – мемлекеттік бас­қа­руды цифрлы трансформациялау процестерін әдістемелік және ұйым­дастырушылық сүйемелдеу және барлық ұлттық жоба мен бағдарламалық құжаттың іске асырылуына мониторинг жасау. Сол себепті Мемлекет басшысының тікелей тапсырмасы бойынша Цифрлы үкіметті қолдау орталығы мемлекеттік органдар үшін жетек­ші талдау орталығы ретінде құры­лып отыр және осы орталықтың құрамында Цифрлы трансформация орталығы да жұмыс істемек. Холдингтің бұрынғы қызметкер­лері де Цифрлы үкіметті қол­дау орталығына жұмысқа ауысады және өздеріне тиесілі бар­лық төлемді толық көлемде алады деп уәде бе­реді министрлік. «Бү­гінгі таңда кадрлық әлеуетті сақтай отырып, мемлекеттік IT-секторын басқа­ру­ды реформа­лау – біздің негізгі басымдығы­мыз. Бұл министрлік­тің, «Зерде» холдингінің және ондағы енші­лес ұйымдардың ортақ міндеті. Ми­нистрлік қызметкерлердің ең жоғары әлеуметтік қорғалуын қам­тамасыз ету қажеттігін және кейін­нен олардың мамандығы мен біліктілігіне сәйкес жұмысқа орналасуын ескере отырып, олар­дың мүдделерін негізге алатын болады. Холдингті тарату кезінде қызметкерлер өздерінің алдағы еңбек қызметінің перспективала­рына қатысты дұрыс шешім қабыл­дауы үшін бүкіл процесс ашық және айқын өтеді», делінген баспасөз хабарламасында.

20 шілде күні Цифрлық даму, инновациялар және аэроғарыш өнер­кәсібі министрі Б.Мусин холдинг ұжымымен арнайы кездесіп қайтты. Бұл жүздесуде алдағы жос­парлар талқыланып, холдингті тарату процесі жан-жақты айтылған. «Таратылып жатқан холдинг қыз­мет­­керлерінің басым көпшілігі жаңа жобалармен бірлесіп жұмыс істеуді жалғастыратынын және цифрлы ведомство жүйесінде қалады деп үміттенеміз», дейді ми­нистрлік мамандары.