Мәдениет және спорт министрлігі биыл тұңғыш рет «Айбоз» ұлттық әдеби сыйлығын жариялаған еді. Жалпы жүлде қоры 35 млн теңгені құрайтын ауқымды байқаудан үміттілер көп. Атап айтсақ, бүгінде әдеби бәйгеге қатысушы 150-ден астам шығарма келіп түскен. Бұл туралы аталған сыйлық жөнінде Орталық коммуникациялар қызметінде өткен брифингте айтылды.
«Биыл 15 маусымда Мәдениет және спорт министрі Дәурен Абаев зиялы қауым өкілдерімен, ақын-жазушылар, журналистермен кездесіп, елімізде тұңғыш рет осы «Айбоз» ұлттық әдеби сыйлығы тағайындалатынын хабарлаған еді. Содан бері екі ай өтті, байқаудың аяқталуына бір ай уақыт қалды. Ұлттық әдеби сыйлықта «Үздік проза», «Үздік поэзия», «Үздік драма», «Үздік аударма», «Үздік балалар әдебиеті», «Үздік комикс» және «Үздік кітап» номинациялары бар. Әр аталымның жеңімпазына 5 млн теңгеден жүлде тағайындалған. Сонымен бірге «Үздік комикс» және «Үздік кітап» номинациялары алғаш рет өткізіліп отыр», деді Мәдениет және спорт министрлігі Архив және құжаттаманы басқару комитетінің төрағасы Қуат Бораш.
Айта кетейік, байқауға өтінімдер aiboz@kitap-palatasy.kz электронды мекенжайына 1 қазанға дейін қабылданады.
«Мұндағы басты талап – жаңа дүниелер ғана қабылданады, шығарма бұрын-соңды еш жерде, әлеуметтік желілер мен газет-журналдарда жарияланбаған болуға тиіс. Екі айда байқауға 150-ден астам шығарма келіп түсті. Көптеген туындының құжаттары дұрыс болмағандықтан, оларды қайтарып, түзетіп қайта жіберуге мүмкіндік беріп жатырмыз. Сұраныс өте көп, бір автордан 4-5 еңбек келетін сәттер де бар. Қызығушылық танытқандар күн сайын арнайы телефонымызға хабарласып жатыр. Шығармалардың дені қыркүйек айында келеді деп ойлаймыз», деді Ұлттық мемлекеттік кітап палатасының директоры Әділ Қойтанов.
Спикердің айтуынша, байқауға қатысушылардың жасына шектеу жоқ. Еркін тақырыптағы барлық көркем шығарма қабылданады.
«Мысалы, жақында 13 жастағы бала хабарласып, өз шығармаларын жіберді. Әрине, біз оған рұқсат еттік. Біздің байқауға 13 жасар баладан Мемлекеттік сыйлықтың лауреаты атанған кісілер де қатысып жатыр. Негізінен проза, поэзия, балалар әдебиеті жанрларына өтінім көптеп түсуде, кітап дизайны бойынша да қатысушылар көп, комикстер әзірге аз», дейді Әділ Қойтанов.
Айта кетейік, әдеби сыйлық жеңімпаздарға жыл соңында тапсырылады. Конкурс нәтижесінен соң жеңімпаздардың шығарма- лары 500 данамен жарық көреді.
Сондай-ақ брифинг барысында Жазушылар одағының мүшесі, жазушы, аудармашы Любовь Шашкова, жас жазушы Садық Шерімбек сөз алып, шығармашылық байқаудың мән-маңызына тоқталды. Әдебиет саласындағы тағы бір жаңалық, 2023 жылдан бастап жас жазушылар мен ақындар үшін арнайы Президенттік әдеби сыйлық тағайындалады. 18 бен 29 жас аралығындағы авторларға арналған байқау да жас таланттарды қолдау мақсатында жасалып отыр.