Корпорация қолға алған игі бастамалар

Осы орайда ӘКК мамандары инвес­тор­ларды көпқабатты тұрғын үй құ­ры­лы­сын, сонымен бірге емхана, мектеп секілді әлеуметтік нысандар салуға шақырып, тиімді ұсыныстарымен қызықтыруда. Бүгінгі таңда ұйымның инвесторламен бірлескен іскерлік портфелінде 440 млрд теңгені құрайтын 61 жоба бар. Оның 35 жобасы көпқабатты тұрғын үй құ­ры­лы­сының саласына тиесілі. Осы жо­ба­лардың нәтижесінде алдағы 5 жылда 1 млн шаршы метр тұрғын үйді пай­да­лануға беру жоспарлануда.

Қаладағы қарқын алған құрылыстың мысалы ретінде жаңадан бой көтеріп ке­ле жатқан Шымкент сити шағын ауда­нын айтуға болады. Онда ӘКК және ин­весторлармен бірлескен тұрғын үй құ­рылысы бойынша 10, ал мектеп құры­лы­сына қатысты 3 жоба жүзеге асуда. Аталған жобаларды қолға алу арқылы келешекте 40 мың шаршы метр тұрғын үйді және 2 900 оқушыға арналған 3 мек­тепті пайдалануға беру көзделіп отыр.

Бүгінде бұл нысандардың құрылысы құрылыс нарығында әбден танылған BI group, «Отау-Строй», OKS, «Орда Строй групп» және тағы сол секілді басқа да мердігер компаниялардың қаты­суымен жүргізіліп жатыр. Осы­лайша, көптеген жыл бойы идея күйінде қа­лып келген «Шымкент сити» жоба­сы­ның бойына қан жүгіріп, бұл шағын ауданда құрылыс жұмыстары қарқын ала бастады.

Ресми дерек бойынша, 2018-2021 жылдары Шымкент қаласында барлық инвестиция көзінен 2 624,5 мың шаршы метр үй пайдалануға берілген. 2022 жылғы жоспарда 1 060 мың шаршы метр үйді ел игілігіне тапсыру көз­де­ліп отыр. Оның ішінде «Нұрлы жер» бағ­дарламасы шеңберінде бюджет есе­бі­нен 239 мың шаршы метр баспана салынуда. Жыл басынан бергі қаңтар-мамыр аралығында жеке инвестиция көз­де­рі­нен халыққа 181 мың шаршы метр үй үлестірілген. Өткен жылдың тиісті ке­зе­ңі­мен салыстырғанда үй құры­лы­сы­ның көрсеткіші 44,5 пайызға өскен.

Сонымен қатар Шымкент қаласы мегаполис атанған соңғы 4 жылда барлық қаржы көзі есебінен 579 млрд теңгеге құрылыс жұмыстары атқарылды. Қала бойынша биылғы орындалатын құрылыс жұ­мыстарының көлемі 162,1 млрд тең­ге­ге тең келіп отыр. 2022 жылдың 5 айының қорытындысы бойынша 30,3 млрд теңгеге құрылыс атқарылған. Бұл өткен жылға қарағанда 103,4 пайызға артық. Бүгінгі таңда қаламыздағы Тұран, Бозарық, Шымкент сити шағын аудан­да­рында және әкімшілік-іскерлік орта­лығында көпқабатты үйлердің құры­лы­сы қарқынды жүргізілуде.

Әлеуметтік кәсіпкерлік корпорациясы – мемлекеттік орган мен бизнес ара­сын жалғап жатқан «алтын көпір». Ұйым қызметінің басты мақсаты – бизнес бастамаларды қолдап, мемлекет-же­­кешелік серіктестік қағидаттары бо­йын­ша Шымкент қаласының әлеумет­тік-экономикалық дамуына үлес қосу. Айталық, ӘКК Shymkent Invest депар­та­менті арқылы инвестиция тартып, жо­баларға жетекшілік жасайды. Осы күнге дейін департамент жеке кәсіп­кер­лер­дің қатысуымен бірге жалпы инвестиция сомасы 66,4 млрд теңгені құрайтын 17 меморандумға қол қойды. Бүгінгі таңда ұйым алдында жалпы көлемі 200 млрд теңге болатын инвестициялық жо­­балардың «1-инвест» статистикалық есеп­­тілігін тапсыру міндеті тұр. 2022 жылдың 8 айының қорытындысы бойын­ша жоғарыда көрсетілген индикатор 62,1 млрд теңгеге орындалған.

Шымкент қаласында жұмыс істеп тұр­ған 3 индустриялық аймақ бар. Олар – «Оңтүстік», «Тассай» және сау­да-ло­гис­тикалық аймағы. Сондай-ақ жа­­ңа­­дан «Жұлдыз» ИА мен «Бозарық» агроин­дустриалды аймағы іске қосылып жатыр. Бұлардың барлығы ӘКК бақы­лауын­дағы кәсіпкерлік алаңдары.

Мәселен, 2010 жылы ашылған «Оң­түс­тік» индустриалды аймағының ин­фра­­құрылымын жүргізуге 6,9 млрд тең­ге жұмсалды. Осы күнге дейін жалпы құ­ны 62,9 млрд теңге болатын 75 ин­вес­ти­циялық жоба іске асырылып, 2 512 жұ­мыс орны құрылды. Биыл 23,9 млрд тең­генің 5 инвестициялық жобасы қол­ға алынып жатыр. Нәтижесінде, 100-ден аса жаңа жұмыс орындары пайда бола­ды. Бүгінде «Оңтүстік» ИА аумағы 100 пайызға толды. Осы кезге шейін индус­триалды аймақтағы кәсіпорындар тара­пынан мемлекеттік қазынаға 25,2 млрд теңге салық төленді.

Сондай-ақ 2016 жылы жалпы ауда­ны 89 гектар болатын «Тассай» ин­дус­­триялық аймағы құрылды. Оның ин­­фра­­құрылымына бюджеттен 1,06 млрд теңге бөлінді. 35 млрд теңгенің 22 инвес­тициялық жобасы іске қосылып, 1 625 адам тұрақты жұмысқа орналас­ты. Сондай-ақ қазіргі таңда 12,9 млрд теңгеге 18 жаңа инвестициялық жоба іске асырылуда. Осы жылы 9 жаңа кә­сіпорын жұмысын бастайды. Соның нәти­жесінде 935 адам жаңа жұмыс орнымен қамтылады. «Тассай» индустриялық ай­мағы да өндіріс орындарымен то­лық­ты. Бюджетке түскен салық көлемі 6,45 млрд теңгеге жетті.

Мегаполисте 92 гектар аумаққа орна­лас­қан «сауда-логистикалық айма­ғы­ның» инфрақұрылымын тартуға мемлекет есебінен 1,7 млрд теңге қаражат кетті. 24,5 млрд теңгеге 3 инвестициялық жоба іске асырылды. Қазір мұнда шамамен 185 адам жұмыс істейді. Сонымен қатар онда 19 млрд теңгені құрайтын 5 жаңа инвестициялық жоба қолға алынып жатыр. Жобалар толық іске қосылғанда 500-ге жуық адам тұрақты жұмыспен қам­тамасыз етіледі. Ал бюджетке түскен са­лық көлемі 820 млн теңгеге жетіп отыр.

2021 жылы Шымкентте 306 гектар аумаққа созылған «Жұлдыз» индус­триал­ды аймағы құрылды. Келесі жылы 3,3 млрд теңге болатын 6 жоба іске қосы­ла­ды және 400-ден аса жаңа жұмыс орындары құрылады. Мұнымен қоса 2022-2026 жылдар аралығын қамтыған 230 млрд теңге көлемінде инвестиция құя­тын 50 компанияның жобалар пулы д­а­йындалды.

«Жұлдыз» индустриалды аймағында 2025 жылға қарай өндіріс көлемі 5%-ға ұлғайып, 20 млрд теңгеден астам салық түсе­ді деп күтілуде. Индустриалды аймақ аумағы 25%-ға толып тұр. Өз кезегінде 2023 жылы тамақ өнеркәсібіне арналған «Бозарық» индустриалды аймағын құ­ру­ға жалпы ауданы 132 гектар аумақта ин­женерлік-инфрақұрылымдық желілер тар­тылады.

ӘКК жетекшілік ететін Тұрақтандыру қоры «Шымкент қаласындағы әлеуметтік ма­ңызы бар азық-түлік тауарларына баға­­ларды тұрақтандыру тетіктерін іс­ке асыру қағидаларын бекіту туралы» Шым­кент қаласы әкімдігінің 2020 жыл­ғы 21 желтоқсандағы №801 қаулы­сына сәйкес қызмет атқарады.

Жалпы, 18 кәсіпкерге 5,8 млн теңге қа­рыз берілген. Аталған кәсіпкерлер мега­полистегі 40-тан аса сауда нүкте­ле­рін­де әлеуметтік маңызы бар азық-түлік тауарларын нарықтық бағадан төмен бағада сатылымға шығаруда.

Сонымен бірге жоғарыда аталған депар­тамент өз қызметі шеңберінде әлеу­­меттік зерттеулер, қаланы жайлы ету­ге жетіспейтін сервистер тұр­­ғы­сы­нан тұрғындардан сауалдама алу, сон­дай-ақ салынып жатқан тұр­ғын үй алаптарындағы аулалар мен гүл­зар­лар­ды абаттандыру жұмыстарын жүр­гі­зеді.

Үшінші мегаполистің инвестициялық ахуалын жақсарту мақсатында 2020 жылғы мамырда «Shymkent» әлеу­мет­тік-кәсіп­керлік корпорациясы» АҚ базасында инвесторлар мен кәсіп­кер­лерді сүйемелдеу мен кеңес беру үшін Фронт-офис құрылған болатын. Бұл кеңсе «бір терезе» қағидатымен қызмет көрсетеді, сондай-ақ әкімшілік кедергілерді жою, кәсіпкерлерге мем­ле­кет­тік қолдау шараларын түсін­діру және жетекшілігіне алу бойынша көмектер ұсынады.

Өз кезегінде халыққа жеңілдетілген несие беретін «Атамекен» микроқаржы ұйымы, білім беру, денсаулық сақтау, мәдениет, спорт, әлеуметтік салаларды қаржыландыратын «Шымкент – қайырымды қала» корпоративтік әлеу­мет­­тік даму қоры, шаһардағы тұ­рақ­ты жолаушы тасымалын ұйым­дас­тырушы ең ірі автобус паркте­рінің бірі «Shymkent Bus» ЖШС және «Оңтүстік» арнайы экономикалық аймағы ӘКК-нің еншілес компаниялары саналады.

Әлеуметтік кәсіпкерлік корпорация­сы 2021 жылдың қорытындысы бо­йын­ша Шымкент қалалық әкімдігі тұлға­сын­­­дағы жалғыз акционерге төлеген ди­видендтер соммасы 2 088 701 000 тең­гені құрады.

Корпорация басшылығы осы жылдар аралығында атқарылған жүйелі жұмыс нәтижесі түрлі жобалардың жүзеге асуына, шаһардың көркеюіне, бизнес бастаушылардың істерінің жандануына оң ықпалын тигізгенін айтады. Осы ретте ӘКК қашанда ашық және қаланың әлеуметтік міндеттерін шешуге бағытталған жобаларды бірлесіп іске асыруға дайын екендерін жеткізеді.

ШЫМКЕНТ