Президент Қасым-Жомарт Тоқаевтың бастамасымен 2022 жыл Балалар жылы деп жарияланды. Тәуелсіз ел болғалы балаларға арнайы ден қойып, маңыз беріп жатқанымыз осы болар.
Бірін ескереміз, бірін ескермейміз, жыл сайын балаларға қатысты қаншама құқық бұзушылық, қылмыс, оқыс оқиғалар болып жатады. Шын мәнінде, соның барлығы терең зерделеуді, тегеурінді тәртіпті қажет етеді. Бүгін балаға мән бермеу – елінің ертеңіне тоңтеріс қараумен бірдей. Мемлекет басшысы өзінің жаңажылдық құттықтауында балаларға ерекше көңіл бөлу керек екенін айтты. «Олардың әл-ауқаты – мемлекетіміздің табысты болашағының сенімді кепілі. Сондықтан осы жылды Балалар жылы деп жариялау керек деп есептеймін» деген Президент бұл жерде әңгіме ұрандар мен мерекелік іс-шаралар туралы емес, ең алдымен билік тарапынан денсаулық сақтау, білім беру, әлеуметтік қамсыздандыру, балалық шақты қорғау бойынша нақты шаралар туралы болып отырғанын атап өтті.
Тұңғыш Президенттің тарихи-мәдени орталығы Балалар жылы аясында көптеген қаладағы балабақша мен мектептегі балалармен көктем мен жаз айларында мәдени іс-шараларды бірлесе атқардық. Атап өтер болсақ, «Қазақстанның киелі жерлерінің картасы» атты квест-ойындары балалардың жазғы демалысы кезінде айлықтар мен апталықтар түрінде үздіксіз ұйымдастырылды. Каникулдағы мектепішілік лагерь балалары үшін орталықта қазақтың ұлттық ойындарын үйрету мақсатында экскурсиялық-ұлттық ойындар топтамасы өтті. Мәселен, 1 маусым күні «Барлығы балалар үшін!» республикалық акциясы аясында Теміртау қаласының білім бөлімі, «Шаңырақ» еріктілер орталығы мен Тұңғыш Президенттің тарихи-мәдени орталығы «АрселорМиттал Теміртау» АҚ қолдауымен «Көңілді жаз-2022» атты мерекелік іс-шара өткізді. Мерекелік концертке Теміртау қаласының 10 мектебінен және 10 балабақшасынан 150-ге тарта оқушы келіп, «Астана» алаңында танымдық ойын стансаларында спорттық (ұлттық ойындар, эстафеталар, спорттық ойындар), зияткерлік станса (үстел ойындары: шахмат, дойбы, тоғызқұмалақ, басқатырғыштар, «Интеллектум» және т.б.), «Әдеби қонақжай» стансасы (мәнерлеп оқу сайысы, викториналар), «Шығармашылық шеберхана» стансасы (саздан, ермексаздан, оригамиден жасалған суреттер, қолдан жасалған бұйымдар конкурсы), ЖЖЕ («ақылды бағдаршамшы») секілді танымдық ойындарға қатысты. Ал Ұлттық домбыра күніне орай Теміртау қаласы «Әлем» балалар-жасөспірімдер шығармашылық орталығы мен «Мирас» вокалды-аспапты ансамблінің тәрбиеленушілері орталықтың шаңырағында ұйымдастырылған мерекелік іс-шараға үлес қосты. Тұңғыш Президенттің тарихи-мәдени орталығы балаларды спортпен шұғылдануға, саламатты өмір салтына шақыру мақсатымен түрлі спорттық жарыстар мен сайыстарды жиі өткізіп отырады.
«Спорт – тәрбие негізі» іс-шарасы балалардың жазғы демалысын көңілді өткізуіне, олардың спортпен шұғылдануына және саламатты өмір салтын насихаттау мақсатында ұйымдастырылды. Сайысқа Теміртау қаласының №2 орта мектебінің оқушылары қатысты. Тағылымды іс-шараны орталықтың басшысы Саида Саргизова ашты. Іс-шараның құрметті қонағы ауыр атлетикадан спорт шебері, кәсіби пауэрлифтингтен әлем және республиканың бірнеше дүркін чемпионы, ардагер-металлург Айтжан Исақов ақсақал жастарға спортпен шұғылдану арқылы көптеген жеңіске жетуге болатыны жайлы ақыл-кеңесін айтты. Мұнан әрі жастар екі командаға бөлініп, қол күресі мен дойбыдан сайысқа түсті.
Бала лайықты тәрбие алсын, бала ұлттық тамырынан ажырамасын, заманға бейім болсын, бос уақытын пайдалы өткізсін, қажетті ем-домын еш кедергісіз алсын, арман-қиялының шындыққа айналарына сенсін. 2022 жыл – бала құқығына қатысты мемлекеттің батыл қимылдары жүзеге асатын берекелі, тиімді жыл болады деген сенім басым.
Құрманшәді ОРАЗЫМБЕТОВ,
Тұңғыш Президенттің тарихи-мәдени орталығының ғылыми қызметкері
Қарағанды облысы