Түркістан облысы әкімдігінің және облыстық Мәдениет басқармасының ұйымдастыруымен, Түркістан төрінде Республика күніне орай халықаралық «Voice of turan» қазақ әндері байқауы өтті. Екі күн бойы әлем елдерінен келген қатысушылар қазақ әндерін шырқап, өз өнерлерін ортаға салды.
Ұлы Тұран даласын әнмен тербеген халықаралық байқаудың бірінші күні шартараптан келген қатысушылар елімізге танымал эстрада әншілерімен бірге қазақ әндерін шырқап, көрерменге көтеріңкі көңіл күй сыйлады. Екінші күні қатысушылар алдымен Шәмші Қалдаяқовтың «Арыс жағасында» әнін бірге орындады. Содан соң байқау талабы бойынша қазақтың танымал әндерін шырқап, қазылар алқасының бағасын алды. Аталған фестиваль қазақ музыкасы мен қазақстандық композиторлардың үздік шығармаларын, сондай-ақ қазақ әндерін әлемге насихаттау, шығармашыл, дарынды жастарды анықтау және оларға қолдау көрсету, халықаралық байланыс пен өзара ынтымақтастықты нығайту, рухани әрі мәдени құндылықтар алмасу, Түркістанның туристік әлеуетін арттыру сынды үлкен мақсат қойған. Байқаудың ашылу салтанатында ТҮРКСОЙ халықаралық ұйымының бас хатшысы Сұлтан Раев фестиваль Ұлы даланың, ата-бабаларымыздың қанында бар ән-жырдың мерекесі екенін атап өтті. Биылғы байқаудың ерекшелігі, Азия елдерінен ғана емес, Еуропа мемлекеттерінен де әншілер келіп қатысты. Түркия, Өзбекстан, Қырғызстан, Татарстан, Әзербайжан, Польша, Черногория, Беларусь, Молдова, Грузия, Сербия, Қарашай-Шеркес республикасы, Бурятия, Македония, Болгария елдерінен келген қатысушылар елімізге танымал эстрада әншілерімен бірге қазақ әндерін шырқады. Олардың қатарында Төлеген Мұхамеджанов, Нұржамал Үсенбаева, Медеу Арынбаев, Айгүл Қосанова, Маржан Арапбаева, Жанар Доғалова, «Меломен» тобы, Рухия Байдүкенова сынды мәдениет майталмандары мен өнер жұлдыздары бар.
Мемлекеттік сыйлықтың лауреаты Төлеген Мұхамеджанов төрағалық еткен қазылар алқасының шешімімен Грузия елінен келген Татия Кобаладзе Гран-при иегері атанды. Ал 1-орын Татарстаннан келген Ильгиз Шайхразиевке бұйырды. Жүлделі 2-орынды сербиялық Стефан Здравкович пен Польша әншісі Михал Качмарек иеленді. Үшінші орынға Катарина Богичевич (Черногория), Христиана Данкова (Болгария), Навруза Махамаджанова (Өзбекстан) лайықты деп танылды. Жеңімпаз бен жүлдегерлерге арнайы дипломдар мен қаржылай сыйлықтар, ал Гран-при иегеріне арнайы статуэтка табысталды.
Айта кетейік, бұған дейін аталған байқау 2 рет онлайн өткен болатын. 2020 жылы Молдова республикасынан Галина Шкода бас жүлдені жеңіп алса, 2021 жылы бурятиялық Цыден Еши Бимбаев Гран-при иегері атанған. Халықаралық ән сайысының нәтижесінде 4 елдің үздік әншілерінен құрылған «Turan Boys» квартеті байқаудың жабылу салтанатында ән шырқады.
ТҮРКІСТАН