Өсіп-өнген, құтайған, шаңырағынан мейір-шапағат төгіліп, жылылық ескен өнегелі әулеттерді әлеуметке кеңінен әйгілеудің маңызы зор. Бұл ретте бұқараның назарын бұрған «Мерейлі отбасы» ұлттық байқауы жыл сайын қаншама үлгілі отбасыны көпшілікке таныстырып келеді. Биыл да осы игі дәстүр жалғасын тауып, еліміздің әр өңірінен жиналған үздік отбасылар Астананың төрін толтырды. Осынау мерейлі шараға қатысқан, жеңімпаз атанған отбасыларға Мемлекет басшысы Қасым-Жомарт Тоқаев арнайы құттықтауын жолдады.
Елдігімізді ту еткен ерекше күн – Республика күні қарсаңында «Мерейлі отбасы» ұлттық байқауының жеңімпаздары «Қазақстан» Орталық концерт залында салтанатты түрде марапатталды.
Осынау ізгі іс-шараның басында сөз алған Президент Әкімшілігі Басшысының орынбасары, Президент жанындағы Әйелдер істері және отбасылық-демографиялық саясат жөніндегі ұлттық комиссияның төрағасы Аида Балаева байқау жеңімпаздарына Мемлекет басшысы Қасым-Жомарт Тоқаевтың құттықтауын оқып берді.
«Жыл сайын өткізілетін байқау шаңырағы шаттыққа бөленіп, берекелі бірлік пен татулыққа ұйыған өнегелі отбасыларды күллі елге танытты. Мұндай үлгілі әулеттер елімізде өте көп. Халқымыз қай заманда да отбасы дәстүрлерін берік ұстанып, қадірлей білген. Үлкенге құрмет, кішіге ізет көрсету – біздің қанымызға сіңген қасиет. Әрбір азаматтың адамгершілік болмысының қалыптасуына отбасындағы ахуал айрықша ықпал етеді. Әке-шешесінің, ата-әженің тәрбиесін көріп, үлкендерден тағлым алып өскен бала есейгенде отаншыл, білімпаз, еңбекқор азаматқа айналады», делінген Президенттің құттықтауында.
Астанадан – Сағитовтар, Алматыдан – Кішкенебаевтар, Шымкенттен – Жақыповтар, Ақмола облысынан – Боженовалар, Ақтөбе облысынан – Оспановтар, Алматы облысынан – Дәрібаевтар, Атырау облысынан – Жанабаевтар, Шығыс Қазақстан облысынан – Бозжігітовтер, Жамбыл облысынан – Ержановтар, Батыс Қазақстан облысынан – Халықұлы, Қарағанды облысынан – Әлімбаевтар, Қызылорда облысынан – Байжановтар, Қостанай облысынан – Шәріповтер, Маңғыстау облысынан – Себепбаевтар, Павлодар облысынан – Мұхтаровтар, Солтүстік Қазақстан облысынан – Мухиндер, Түркістан облысынан – Күлбайымбетоватер, Абай облысынан – Зәмзебаевтар, Жетісу облысынан – Андас, Ұлытау облысынан Әйтеновтер отбасы құрметке бөленді.
Рухани құндылықтарымызды дәріптейтін игі дәстүрге айналған биылғы байқауға 2 542 отбасы қатысуға ниет танытты. Олардың жартысынан астамы, дәлірек айтсақ, 63,4%-ы – ауыл тұрғындары. Бұл, бір жағынан, айрандай ұйып отырған ауыл-аймақта әлі күнге дейін қазақылықтың қаймағы бұзыла қоймағанын, ақ-адал пейілі, көл-көсір көңілі, тату-тәтті тұрмысы бар екенін көрсетеді.
Бұған қоса үйелмелі-сүйелмелі балалары бар 1 166 үлгілі отбасы қатысты. Сондай-ақ ерлі-зайыптының екеуі де 29 жасқа толмаған 501 жас отбасы осы байқауда бақ сынады.
Түрлі кәсіп пен еңбек әулеттерінің, спорт және шығармашылық өкілдерінен құралған 20 отбасы өңір жеңімпаздары атанды. «Мерейлі отбасы» ұлттық байқауы – үлкенге құрмет, кішіге ізет рухани-адамгершілік қағидасына негіз- делген және оны ұрпақтан-ұрпаққа жеткізуді көздейтін отбасы құндылығын дәріптеп келеді. Барлық отбасының әрбір мүшесі ауылдастарының, қала тұрғындарының, әріптестерінің, көрші-қолаңның құрметіне бөленген, Отанына адал қызмет етіп жүрген еңбек адамы, ауылдың, қаланың қарапайым еңбеккерлері.
Марапаттау рәсіміне мемлекеттік органдардың өкілдері, Парламент Сенаты мен Мәжілісінің депутаттары, Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссияның мүшелері қатысты.
Лауреат отбасылар дипломдармен және естелік сыйлықтармен марапатталды. Марапаттау рәсімі қазақ эстрада жұлдыздарының қатысуымен өткен мерекелік концертпен жалғасты.
Жалпы, елімізде отбасы құндылықтарының рөлін арттырып, отбасы мен некенің оң имиджін дәріптейтін ауқымды да маңызды байқауға 2014 жылдан бері 20 мыңнан аса отбасы қатысқан.