Келесі аптада Алатау баурайындағы әсем шаһарда мәнерлеп сырғанау спортының «мұзбалағы», 2014 жылғы Сочи Олимпиадасының қола жүлдегері Денис Тенді еске түсіруге арналған ІІІ халықаралық турнирдің жалауы желбірейді. Халықаралық коньки тебушілер одағы (ISU) ұйымдастыратын Challenger санатындағы жарыс 26-28 қазан күндері Алматыдағы «Халық Арена» спорт кешенінде өтеді.
Қазақтың даңқты мәнерлеп сырғанаушысы Денис Тенді еске алуға арналған турнир аз уақыттың ішінде дәстүрлі жарыстың біріне айналып үлгерді. Дүние жүзінің спортшылары бас қосатын халықаралық турнирдің тұсауы ең алғаш 2019 жылы Алматыда кесілген болатын. Дегенмен, 2021 жылғы жарыс оңтүстік астанадан елордаға көшірілді. Сөйтіп бас қалада өткен байрақты бәсекеде әлемнің 18 елінен келген спортшылар шеберлік байқасты. Олардың қатарында Ресей біріншілігінің қола жүлдегері Марк Кондратюк, 2020 жылғы жасөспірімдер Олимпиадасының күміс жүлдегері, жастар арасындағы әлем чемпионы Андрей Мозалев, жастар арасындағы әлем чемпионатының қола жүлдегері Петр Гумменик, жастар арасындағы гран-при жарыстарының жеңімпазы мен жүлдегерлері Анастасия Мухортова, Дмитрий Евгеньев және тағы басқа мәнерлеп сырғанаушылар бар.
Биыл ISU Challenger-дің 7-кезеңі саналатын «Денис Тен мемориалы» Мәдениет және спорт министрлігіне қарасты Спортты дамыту дирекциясы мен Алматы қаласы әкімдігінің қолдауымен «Халық Арена» спорт кешенінде өтеді. Қазірдің өзінде аталған жарысқа Жапония, Корея, Италия, Франция, Германия, Израиль, Болгария, Мажарстан, Әзербайжан, Молдова, Армения, Грузия, Украина және Қырғызстан Ұлттық федерациялары спортшы жіберетіндерін растады. Ал қазақстандық мәнерлеп сырғанаушылар барлық бағдарламада өнер көрсетеді.
Биылғы мемориалдың басты қойылымы – жапониялық Кана Мурамото мен Дайсукэ Такахаси жұбының биі болмақ. Денистің досы болған Дайсукэ Такахаси – жекелей сында сәтті өнер көрсеткен спортшы, 2010 жылы Ванкувердегі Олимпиаданың жүлдегері атанған.
Сондай-ақ биылғы жарысқа арнайы шақырылған қонақтар қатарында халықаралық дәрежедегі спорт шебері Марина Зуева, Олимпиада чемпиондары Гордеева-Гринков пен Вертью-Скотт, Олимпиада жеңімпазы канадалық Патрик Чан және т.б. бар. Турнир жеңімпаздарын марапаттау рәсімінен кейін спортшылардың қатысуымен Гала-шоу өтеді.
Айта кетейік, ISU Challenger Series турнирлері 2014 жылдан бастап қыркүйектен желтоқсанға дейін өтеді. ISU Челленджер сериясына енгізілген жарыстардың тізімін жыл сайын қайта бекітіп отырады.
Денис Тен де кезінде ISU Challenger сериясында екі рет жеңіске жеткен. Отандасымыз 2014 жылы жаттығулардың тығыз кестесі мен жоспарланған өзге жарыстарға қарамастан, осы серияға да қатысуға шешім қабылдаған болатын. Хорватиядағы Zlatna pirueta Zagreba турнирінде керемет өнер көрсетіп, 1-орынды жеңіп алды. 2015 жылы да Денис Загребтегі додада тағы да үздік шыққан еді.