Деректерге көз жүгіртсек, жаһандағы әрбір үшінші адам қанға мұқтаж көрінеді. Жалпы, донорлық қанның жетіспейтіні туралы біраз жылдың бедерінде көптеген мәлімет тараған еді. Десе де, кейінгі уақытта хәл үстінде жатқан азаматтарға өмір сыйлауға құштар жандардың қарасы көбейе түскені көңіл қуантады.
Облыстық қан орталығының басшысы Гулам Умаровтың айтуынша, адамдардың қан тапсыруы бір жағынан сауапты іс саналса, екінші жағынан азаматтың денсаулығы үшін де пайдасы мол екен. Қысқасы, донорлық қан тапсырған адам кісі баласына жақсылық жасап қана қоймай, өз денсаулығын жақсартуға да мүмкіндік алмақ.
«Бағамдап қарасақ, қан тапсыру – сауапты әрі жауапты іс. Бұл қадам донордың өзіне физиологиялық жағынан да, психологиялық тұрғыдан да пайдалы. Егер еліміздің әрбір тұрғыны қан тапсыруды өзіне азаматтық парыз деп санаса, сан мыңдаған науқас ауруынан айығып, аяғына нық тұрар еді. Әрі қан тапсырған адамның қан айналу және иммундық жүйесі жақсарады. Сонымен қатар организмі нығайып, жүрек-қан тамыр жүйесі кеселдерінің профилактикасы қамтамасыз етіледі. Бәрінен бұрын қиналғанға қолұшын созудың моральдық пайдасы мол. Осы орайда БАҚ және әлеуметтік желілер арқылы түсіндірме жұмыстары да кеңінен жүргізілуде. Сондай-ақ облыстағы мекеме-кәсіпорындарда акциялар ұйымдастыру игі дәстүрге айналған. Биылғы маусым айында Тараз қаласындағы «Жастар» аллеясында Дүниежүзілік қан доноры күніне орай ауқымды іс-шара ұйымдастырылды. «Қан донорлығы – ынтымақтастық негізі. Донор болыңыз және адам өмірін сақтауға үлес қосыңыз» ұранымен өткен акция аясында шатырлар тігіліп, LED-экран арқылы тақырыптық бейнероликтер көрсетілді», дейді Г.Умаров.
Орталық басшысының айтуынша, облыс әкімдігі денсаулық сақтау басқармасы, облыстық кәсіпкерлер палатасы және «Қызыл Ай» қоғамы облыстық филиалы арасында үшжақты меморандумға қол қойылған. Сол арқылы да донор болуға ниетті азаматтардың қарасын арттыруға айрықша назар аударылып отыр.
Салаға көрсетілген қамқорлықтың арқасында қан орталықтарының материалдық-техникалық базасы нығая түсуде. Облыстық қан орталығы заман талабына сай еңселі ғимаратта қызмет көрсетуде. Бүгінде мекемеде 112 адам еңбек етеді. Кәсіпорын донорлық қан мен оның компоненттерін дайындаумен, өңдеумен, тексерумен, Жамбыл облысының барлық емдеу-профилактикалық ұйымдарын қамтамасыз етумен, сондай-ақ техногендік және табиғи сипаттағы төтенше жағдайлар кезінде қан компоненттерінің қорын құрумен айналысады.
Жылдық қуаттылық 15,0 мың литр қан мен оның компоненттерін әзірлеуге негізделген. Технология ілгерілеген сайын науқасқа донордан тікелей қан құйылған күндер де келмеске кетті. Қазіргі таңда донордан алынған қан одан әрі көптеген компонентке бөлінеді және олар белгілі мақсатта қолданылады. Сондай-ақ қан орталығында «Іnfo-Donor» бағдарламасы аясында қан қызметінің автоматтандырылған ақпараттық жүйесі жұмыс істеп тұр. Дайындаудың және тексерудің барлық кезеңі компьютерлік жүйеге енгізіліп, донордың келуінен бастап қан тапсыруы, дайындалған қанды ауруханаларға беруге дейінгі үдеріс бақылауда. Осы орайда сандарды сөйлете кетсек, 2022 жылдың 9 айында барлығы 28 262 қан компоненті емдеу-профилактикалық ұйымдарына берілді, жалпы 5 мың реципиентке құйылды.
Орталық басшысының сөзіне сүйенсек, өңірдегі қан тапсыруға ниетті азаматтардың саны жыл өткен сайын артып келеді. Бұл бірінші кезекте мамандардың жүргізген сапалы жұмысының нәтижесі болса, екіншіден, жергілікті халық та донор болудың қоғам үшін пайдасын түсінгенін айғақтай түссе керек.
Жамбыл облысы