Алматы зообағына әкелінген ақ төсті тұқандардың (тукан) видеосы зообақтың әлеуметтік желідегі парақшасында жарияланды.
«Құстар Армения астанасы – Ереван қаласынан әкелінді. Олар әлі кішкентай, екі жаста. Қазір олар аквариум жанындағы Құстар үйінде тұрады. Тоқылдақ тәрізділер класына жататын, тұмсығы мүйізге ұқсас бұл құстардың отаны – Оңтүстік Америка ормандары», деп хабарлады зообақ өкілдері.
Сондай-ақ зообақта тұқандардың вольерге тез үйреніп, өздерін күтуші киперлермен достасып, көпшіліктің сүйікті құсына айналғанын хабарлады. Тропикалық құстар банан, апельсин сияқты жемістермен қатар, тышқан, құс жұмыртқаларымен қоректенеді. Тұқандар 20 жыл өмір сүреді. Ақ кеуделі тұқан Халықаралық табиғат қорғау одағының Қызыл кітабына енгізілген.