Шымкент қаласы әкімінің бірінші орынбасары Шыңғыс Мұқан мен қалалық денешынықтыру және спорт басқармасының басшысы Бауыржан Тұманбаев, сондай-ақ спорт мектебінің басшылары Испанияның Ла-Нусия қаласында бокстан өткен жастар арасындағы әлем чемпионатынан жеңімпаз боп оралған Элина Базарова мен эстетикалық топтық гимнастикадан Грацтағы (Аустрия) әлем чемпионатынан 3-орын иеленіп қайтқан «Кармелиты» командасының мүшелерін әуежайдан салтанатпен күтіп алды.
Ұлттық құрама сапында өнер көрсететін шымкенттік ару, былғары қолғап шебері Э.Базарова 54 кило салмақта жасөспірімдер арасында бокстан әлем чемпионы атанды.
Жерлестерін желпінткен жеңімпаздарды Шымкент жұртшылығы жылы шыраймен қарсы алды.
«Сонау Испания төрінен, алыстағы Аустрия жерінен еліміздің атын шығарып, көк байрағымызды желбіретіп қайтқан ару спортшылардың жеңістері мен жүлделері барша шымкенттік жанкүйерді ерекше қуантып отыр. Әлбетте спорт саласында жетістікке жеткен осындай жастардың ісіне сүйсінетін, солар секілді биікке ұмтылуға, еліктеуге талпынатын замандастарының ортадан табылары хақ. Сондықтан бұл жеңістер алда күтіп тұрған бұдан да үлкен сайыстарға жол ашатынына сенеміз. Шымкент қаласының спортын әлемдік жарыста олжа салу арқылы бір саты жоғары көтерген өрендерге алғысымыз шексіз. Келешекте әлі талай спорттық бәсекелер болады. Сол жарыстарда тағы да Сіздерді жүлделі орыннан көреміз деген үміттеміз. Шымкенттік спортшылардың әлемдік спорт аренасында жүлдесіз қайтпауы мегаполисте бұл салаға көңіл бөлініп жатқанын білдіреді және алдағы уақытта да бұқаралық және кәсіби спортқа жасөспірімдер мен жастарды баулу ісі қарқынын күшейтпесе, кемітпейді. Жас өрендерді спортқа тарту, еліміздің атын шығарар түрлі жарыстарға дайындау мәселесі әрдайым басты назарда тұрады», деді құттықтаумен бірге ақжарма тілегін қоса жеткізген қала әкімінің бірінші орынбасары Ш.Мұқан.
Айта кету керек, Э.Базарова әлем чемпионатында төрт кездесу өткізген. Соның бәрінде де қарсыластарын айқын басымдықпен жеңіп шықты. Финалдық кездесуде германиялық Куцохристоу Крисовалантумен жұдырықтасып, жігер мен шеберлігінің арқасында жеңіске жетті. Осылайша, бапкері мен жанкүйерлерінің үміті ақталды. Ал жалпы осы додада қазақ елінен барған боксшыларымыз 7 медальды қанжығаларына байлап, жалпыкомандалық есепте үшінші орынды алып қайтты.
Өз кезегінде эстетикалық топтық гимнастикадан әлем чемпионаты да өте тартысты өтті. Бәсекесі жоғары спортта Қазақстан құрамасы сапында Элина Кан, Саида Патшахан, Аида Жақсыбек, Сәния Тұрдыбай, Сабина Елубаева секілді өрендер сайысқа түсіп, жүлделі орын үшін таласта нәтиже шығара білді.
ШЫМКЕНТ