Үздіктер іріктеле бастады

Әдетте футбол жанкүйерлері әлем чемпионаты, Еуропа бірін­шілігі сияқты ірі турнирлердің соңғы турында тек формалды матч­тарды ғана тамашалайтын. Яғни фавориттер бар мәселені мерзімінен бұрын шешіп тастап, кей топтарда құрамалар көбіне екінші жолдамаға және топтағы бірінші орынға талас жүргізетін. Ал биылғы әлем біріншілігінің соңғы туры алдында барлық құ­рамада дерлік плей-офф кезеңіне шығу мүмкіндігі сақталып қалды. Бірақ шешуші матчтардағы бір ғана қателік, сол құраманы аяқтан шалуы мүмкін еді. Мәселен, ке­шегі Эквадор мен Сенегал, Иран мен АҚШ арасындағы матчта Эквадор және Иран құрамалары сол қателіктерінің салдарынан топ­­тық кезеңнен шыға алмай қал­ды.

А тобының соңғы тур матчтары қарсаңында Нидерландтың өзге қарсыластарына қарағанда плей-оффқа еш қиындықсыз шы­ғатыны, ал Қатардың екін­ші тур­дан кейін-ақ топтық кезең­нен әріге аса алмайтыны бел­гілі еді. Жанкүйерлер тарапынан Нидерланд – Қатар матчына көп ықылас бола қоймағаны сондықтан. Оның үстіне, екі тур­да қарсыластарына ұпай таратқан Қатардың сенсация жасап, Нидер­ланд құрамасын жеңе алмайтыны да түсінікті еді. «Әл Байт» ста­дионындағы матчтың бірінші таймында Коди Гакпо мен екінші таймындағы Френки де Йонгтің голынан кейін Нидерланд футболшылары 2:0 есебімен жеңіске жетті.

Ал бұл топтың тартысты матчы Сенегал мен Эквадор құра­малары арасында өтті. Себебі екі құраманың да келесі кезеңге шығуға толық мүмкіндігі бар. Мәселен, Сенегал футболшыларына жеңіске жеткен жағдайда ғана плей-офф жолдамасы бұйы­ратын болса, Эквадорға тең нәтиже де жеткілікті еді. Алайда Оңтүстік Америка құрлығының өкіл­дері бұл мүмкіндікті пайдала­на алмады. Бірінші тайм аяқта­лар тұста төреші Эквадор қақ­па­сына пенальти белгіледі. Оны Сенегалдың футболшысы Ис­маила Сарр сәтті орындап, құра­масын есепте алға шығарды. Екін­ші таймда Эквадор өкілі Моисес Кайседо таразы басын теңестіріп, жанкүйерлерін бір сәтке қуанышқа бөлеген еді. Бірақ арада екі минут өткенде Сенегал капитаны Калиду Кулибали гол соғып, құрамасын 1/8 финалға шығарса, Эквадор футболшыларын жанкүйерлерімен қоса еліне қайтарды.

В тобындағы квартетте Иран, АҚШ және Уэльс құрамаларына қарағанда Англияның келесі ке­зеңге өту мүмкіндігі жоғары бола­тын. Ағылшындар Уэльстен 4:0 есебімен жеңілген жағдайда ғана топтан шыға алмайтын еді. Ал Уэльсті тек жеңіс қана қанағат­танды­ратын, онда да Иран мен АҚШ құрамалары тең ойнауға тиіс. Алайда Қатардағы Бри­та­­ния дербиінде Англияның, Иран – АҚШ бәсекесінде амери­ка­лықтардың мерейі үстем болды.

Алғашқы турда Иранды 6:2 есе­бімен тізе бүктірген ағылшындар екінші ойында АҚШ қақпасына бірде-бір гол соға алмай, әбден пұ­шайман болған-ды. Содан болар, Гарет Саутгейт жетекшілік ететін Тұманды Альбион өкілдері кешегі матчта Уэльс қақпасына жауапсыз үш гол соқты. Екінші таймның 50-минутында Маркус Раш­форд матчтың есебін ашса, арада екі минут өткенде Фил Фоден мер­гендігімен көзге түсті. Ал 68-минутта дубльдің авторы атанған Раш­форд ойынның нүктесін қойды.

Ал қатарлас өткен екінші матч­та АҚШ құрамасы Кристиан Пу­ли­шичтің бірінші таймда соқ­­­қан жалғыз голының арқа­сын­да Иранды жарыс жолынан ығыс­ты­рып, 1/8 финалға жолдама ал­ды. Топтық кезеңнің ең бір қы­зықты матчына баланған ойында көпшілік азиялық құраманың тілеуін тілегені белгілі. Дегенмен Парсы шығанағы өкілдері Қатар­дың соңына ілесіп, әлем чемпионатымен ерте қоштасты. АҚШ пен Иран футболшылары 1998 жылы Францияда ұйымдастырылған әлемдік доп додасының бір тобында өнер көрсетіп, сол кезде де дәл осындай шешуші турда бір-бірімен кездескен. Екі құрама үшін еш маңызы болмаған сол матч­та Иран құрамасы 2:1 есебімен жеңіс тойын тойлаған еді. Араға 24 жыл салып АҚШ Ираннан есе қайтарып қана қоймай, өз тарихында үшінші мәрте 1/8 кезеңге жолдама алды.

Осылайша, А және В топта­рының үшінші тур матчтарынан кейін 1/8 финалда кездесетін ал­ғашқы екі жұп белгілі болды. Плей-оффта А тобының жеңімпазы Нидерланд В тобында екінші орын алған АҚШ құрамасымен (3 желтоқсан), А тобының екінші орын иегері Сенегал В тобының үздігі Англиямен (4 желтоқсан) кездеседі.