Өзбекстанның бейнелеу өнері галереясында ақын Абайдың өмірі мен шығармашылығына арналған «Абай. Бауырлас халықтардың мұрасы» атты көрме ашылды. Рухани іс-шараның ашылу салтанатына Өзбекстан Премьер-министрінің орынбасары, Туризм және мәдени мұра министрі Әзиз Әбдіхақымов, Қазақстанның Мәдениет және спорт министрі Дәурен Абаев, Қазақстанның Өзбекстандағы Төтенше және өкілетті елшісі Бейбіт Атамқұлов, «Жидебай-Бөрілі» Абай музейінің директоры Тұрдықұл Шанбай, Бейнелеу өнері галереясының директоры Камола Акилова және зиялы қауым өкілдері қатысты. Сондай-ақ Ташкент қаласында Абай Құнанбайұлы ескерткішіне гүл шоқтарын қою рәсімі өтті.
Қазақстанның Мәдениет және спорт министрі Дәурен Абаев көрме жұмысын ұйымдастырғаны үшін көршілес ел тарапына алғыс айтты.
«Әлішер Науаи мен Абайдың шығармашылығы – жалпы адамзат құндылықтарының қалыптасу үлгісін бейнелейтін ұлы мұра. Екі ойшыл әртүрлі уақытта өмір сүрсе де, оларды гуманизмге деген ұмтылыс пен поэзиядағы реформаторлық рух біріктіреді. Екеуі де бауырлас халықтың рухани тірегі», деді министр.
Ал Өзбекстан Премьер-министрінің орынбасары, Туризм және мәдени мұра министрі Әзиз Әбдіхақымов қазіргі уақытта түркі халықтарының мәдени жәдігерлерін сақтау және қалпына келтіру бойынша үлкен жұмыстар жүргізіліп жатқанын атап өтті.
«Қазақтың үлкен ойшылы Абайдың шығармашылығына арналған көрменің ашылуы – Өзбекстан мен Қазақстан арасындағы достықтың нығайып келе жатқанын айғақтайды. Осы мүмкіндікті пайдалана отырып, Қазақстанның Мәдениет және спорт министрі Дәурен Абаевқа «Өзбекстанға қош келдіңіз» деп айтқым келеді. Бүгін ашылған көрме ұлы ойшыл Әлішер Науаидің гуманистік дәстүрлерін сақтаған Абай шығармашылығын жақсы түсінуге мүмкіндік беретініне сенімдіміз. Оның шығыс пен батыстың бірлігі туралы, әлемдік мұраны игеру қажеттілігі, энциклопедизмге ұмтылу, адам табиғатын жетілдіру туралы идеялары қазіргі кезеңде де өзектілігін жоғалтқан жоқ», деді Әзиз Әбдіхақымов.
Бауырлас елде ашылған көрме «Көшпелі мәдениет Абайдың қалыптасуының негізгі факторы ретінде», «Әлішер Науаидің Абайды қалыптастырудағы рухани тәлімгер ретіндегі рөлі», «Абай өмірінің негізгі кезеңдері», «Суретшілер Ә.Қастеев, О.Таңсықбаев, Е.Сидоркин, Н.Өтепбаев және т.б. шығармаларындағы Абай кейіпкерлері мен сюжеттері» атты бөлімдерден тұрады. Онда қазақтың дәстүрлі тұрмысы, сәндік-қолданбалы өнері, кескіндеме, графика, Абай туралы басылымдар, оның шығармалары ұсынылған.
Айта кетейік, «Абай. Бауырлас халықтардың мұрасы» көрмесі Ташкент қаласында 19-30 желтоқсан күндері аралығында өтеді.