Ресей президенті Владимир Путин жыл сайынғы жолдауын жариялады. Ол екі сағатқа жуық сөз сөйледі. Соңында Ресей ядролық сынақтарды қайта бастай алатынын, сондай-ақ Стратегиялық шабуыл қаруларын шектеу туралы шартты тоқтата алатынын мәлімдеді, деп хабарлайды Egemen.kz.
Владимир Путин Ресейдің стратегиялық шабуыл қарулары туралы шартқа қатысуын тоқтатыны туралы жариялады. Бұл шартқа ең алғаш 1991 жылы Джорд Буш пен Михаил Горбачёв қол қойған болатын. Екінші келісім 1993 жылы Джордж Буш пен Борис Ельциннің арасында жасалған. Ал үшінші келісім 2010 жылы 8 сәуірде жасалып, 2011 жылы 5 ақпанда күшіне енген.
АҚШ-пен жасалған бұл келісім екі елдің ядролық арсеналдарын шектейтін құжат. СШҚ-ІІІ елдердің қарым-қатынасындағы дағдарыс жағдайында да тоқтамаған болатын.
Сарапшылар Кремльдің шешімі ядролық қаруды қолдану қаупін тудыруы мүмкін деп ескертті. АҚШ бұған дейін де Ресейді шарт талаптарын бұзды деп айыптаған болатын.