Науырызым қорығында биыл зорман ерте оянды. ЮНЕСКО қорғауындағы далалы-орманды алқапқа бай табиғи қорықта саршұнақтардың үш түрі тіршілік етеді. Зорман соның ішіндегі ең ірісі.
Алты ай қыс алаңсыз ұйықтаған он шақты кеміргіштің 28 ақпанда індерінен шығып бара жатқанын қорықтың мемлекеттік инспекторы Қанатхан Кәрімов көріп қалыпты.
Әдетте зормандар өзге тұқымдастарына қарағанда ерте оянады. Бірақ белсенді тіршілігі ұзаққа бармайды, жылына төрт-ақ ай ояу жүреді.
– 2022 жылы Науырызым зормандары 7 наурызда оянған. Биыл ақпанның соңғы он күні жылы болды. Содан болар, зорман да інінен ерте шықты, – дейді қорықтың ғылыми қызметкері Ришат Батряков.
Маманның айтуынша, бір айдан соң зормандар көбейе бастайды. Жаңа туған тышқандары мамырдың аяғында өздеріне жеке ін қазып алады. Ал ұзақ ұйқыға кетер алдында қысқа қоң жинап, әбден семіреді. Ұйқыға кететін мезгіл жақындағанда бір зорманның салмағы 1,6 килоға дейін жетеді. Ал күн ысып, шөп қата бастағанда зорман да жазғы ұйқысына жатады. Осылайша, жазғы ұйқысынан оянбастан, қысқы ұйқыға өтіп кетеді.
Өсімдік қоректі дала зормандары көбіне жыртқыш құстар мен қасқыр, түлкі сияқты аңдарға жемтік болады.
Қостанай облысы