«Нағыз қазақ қазақ емес, нағыз қазақ – домбыра» демекші, қаршадайынан қолына қара домбыра ұстап, ұлттық өнерге ден қойған ұрпақтарға сүйінбей тұра алмайсыз. Еліміздің жеті мың білім беру ұйымында бір мезгілде «Балбырауын», «Адай» және «Сарыарқа» күйлері орындалды.
Оқу-ағарту министрі Ғани Бейсембаевтың айтуынша, музыка, әсіресе домбыраның әуезді үні барлық ұлтты жалпы адами құндылықтарға – толеранттылыққа, төзімділікке, бірлікке үндеп, бір арнаға тоғыстырады. Әрі өскелең ұрпақтың өз тарихы мен өнерін үйренуге деген ұмтылысы мен қызығушылығын оятады.
– Домбыра – мәдениетіміздің негізгі символдарының бірі, ұлттық құндылығымыз. Балабақшаның кішкентай тәрбиеленушілері, оқушылар, колледж студенттері ұлттық аспапта ойнауға белсенділік танытқаны қуантады. Бүгін домбыраның шанағынан төгілген үн еліміздің әр өңірінде әуеледі. Оқушылар ұрпақтан-ұрпаққа жалғасып келе жатқан мәдени мұраны сақтап, одан әрі жалғастырады деп сенемін, – деді Ғани Бейсембаев.
Челлендж соңында Оқу-ағарту министрі елордадағы Д.Қонаев атындағы №66 мектеп-лицейінің оқушыларымен бірге күй орындады. «Наурыз мейрамы» мерекелік эстафетасына 1 миллионға жуық оқушы қатысты. Ең кішкентайы – Батыс Қазақстан облысы Теректі ауданындағы «Ақбота» балабақшасының тәрбиеленушілері.
Биыл «Наурыз мейрамы» эстафетасы еліміздің барлық мектебінде кең көлемде қамтылды. Мереке кезінде жалпы республикалық «Таза табиғат» акциясы, «Жасыл үй» челленджі, «Қайырымды ұлт», «Қолөнершілер жәрмеңкесі» қайырымдылық шарасы, ұлттық тағамдар фестивалі мен ұлттық ойындар мерекесі аталып өтілді.