Қазақстанның бірінші, кешегі күннен бастап әлемнің жетінші ракеткасы атанған Елена Рыбакина АҚШ-тағы тағы бір ірі жарыс – Майами WTA 1000 турнирінде өнер көрсетеді.
Жүлде қоры 8,8 млн долларға бағаланған «Мастерс» додасы 21 наурыз бен 2 сәуір аралығында өтеді. Қазақстан теннис федерациясының мәліметі бойынша, жарыстың 10-ракеткасы болып тіркелген Рыбакина турнирді екінші айналымнан бастайды. Бұл кезеңде ол әлемнің 60-ракеткасы ресейлік Анна Калинская немесе рейтингте 194-орында тұрған Андорра өкілі Виктория Хименес Касинцева жұбының жеңімпазымен кездеседі. Егер жерлесіміз бұл додада да сәтті өнер көрсетіп жатса, финалда тағы да Беларусь өкілі Арина Соболенкомен кездесуі мүмкін.
Рыбакинадан бөлек, «Мастерс» жарысында тағы бір қазақстандық теннисші, әлемнің 42-ракеткасы Юлия Путинцева да бақ сынайды. Ол алғашқы айналымда рейтингте 75-сатыдағы канадалық Ребекка Мариномен шеберлік байқасады.