Ұлыстың ұлы күні – Наурыз мерекесі Шымкент қаласында ерекше леппен басталды. Әз Наурыздың айрықша өрнегімен тойлануының басты себебі, мегаполисте бірнеше жыл қатарынан құрылысы жүргізілген, қала тұрмақ республика көлемінде ең ауқымды жобалардың бірі саналған жаңа ипподром күні кеше ашылды. Осынау қуанышты сәттің Ұлық мерекемен тұспа-тұс келуіне байланысты атшабарда «Наурыз Шымкенттен басталады» атты мерекелік концерт ұйымдастырылды. Ипподромның ашылуын және думанды іс-шараны тамашалауға шаһардың жасы мен кәрісі түгел жиналды.
Атшабардың тұсаукесер рәсімінде аттың құлағында ойнаған қыз-жігіттер қазақтың дәстүрлі қыз қуу, теңге ілу секілді ұлттық ат спорты түрлерінен өнерлерін паш етті. Содан соң кезек театрландырылған көрініске жетіп, еліміздің әр өңірінің салт-дәстүрін насихаттайтын Батыс пен Шығыстың, Солтүстік пен Оңтүстік өлкелерінің атынан шыққан көш керуені мінбердегі жүздеген көрерменнің алдынан жүріп өтті. Атқа жегілген күйме, әсем безендірілген түйелермен маң-маң басып жүріп өткен керуен ішіндегілер әр өңірдің тумалары мен танымал азаматтары және белгілі өнерпаздары мен спортшылары болды. Мәселен, Батыс керуенін елімізге белгілі әнші Т.Асар бастаса, Шығыс керуенін дәстүрлі әнші А.Балажанова өзінің әсем әнімен соңынан ілестірді. Солтүстік аймақтың керуенінің алдында ән салып шығу танымал эстрада әншісі М.Сәдуақасоваға бұйырды, ал Оңтүстіктің керуенін дәстүрлі әнші Н.Серікбаева тізгініне алды. Мұнан кейін ат спортының майталман жігіттері акробатикалық тәсілмен бірінің үстіне бірі мінгесіп, көк туымызды төбелеріне көтеріп бәйге алаңының көрермен отырған тұсынан алып өтті.
Салтанатты шарада Шымкент қаласының әкімі Мұрат Әйтенов пен осы алып атшабарды шаһарға тарту ретінде салып берген отандық «BI GROUP» құрылыс компаниясының бас директоры Айдын Рахымбаев құттықтау сөз сөйледі.
Сөз тізгінін бірінші алған компания басшысы А.Рахымбаев «осыдан бір жарым жыл бұрын мегаполис халқына заманауи, халықаралық стандарттарға сай келетін жап-жаңа ипподром салып береміз деп уәде берген едік. Сол уәдемізде тұрып, бүгін міне оның ашылу салтанатын тойлап отырмыз. Біле білсек, бұл Қазақстандағы ең үлкен атшабар кешені болып саналады», деді.
Өз кезегінде қала әкімі М.Әйтенов осынау алып атшабарды өз қаржысына тұрғызып, сөйтіп, шымкенттіктердің игілігіне пайдалануға тапсырған «BI GROUP» компаниясының жомарттығы мен сауапты ісіне алғысын білдірді.
«Наурыз мейрамының қарсаңында ұлттық спорттың дамуына үлкен үлес қосатын заманауи ипподромның ашылуына орай баршамыз бас қосып отырмыз. Біздің бүгінгі қуанышымызға ортақтасып келгені үшін кезінде Шымкенттің, тұтас оңтүстік өңірінің аяққа тұруына аянбай тер төккен еңбек ардагерлеріне, қадірменді ақсақалдарға алғысымды айтамын. Ендеше, Наурыз мерекесі баршамызға құтты болсын! Шын мәнінде, бұл оқиға қала тарихында өзінің өшпес ізін қалдырары сөзсіз. Ал ипподромның ашылу салтанатына орай ұлттық спорт түрлерінен халықаралық жарыс ұйымдастырылатын болады. Оған 1 мыңнан астам спортшы, соның ішінде 126 шетелдік өрен қатыспақ. Алдағы уақытта, жаңа ипподром ұлттық ат спортының дамуына, түрленуіне тың серпін беретіні сөзсіз», деді шаһар басшысы.
Осылайша, иппадромның ашылу салтанатына арналған мерекелік бағдарлама соңы жаппай «Қаражорға» биіне ұласты.
Ал ипподромның өзіне келсек, мұндағы бәйге алаңы еліміз бойынша ең үлкені. Оның аумағында 1 500 көрерменге арналған трибуна, ат аренасы бар манеждер, жабық стенд ғимараты, ветеринарлық блок бар және 300-ден астам көлікке арналған тұрақ қарастырылған. Трибунаның жоғары қабатында ашық терраса жайғасқан. Ұзындығы 2012 метрлік жарыс жолы бірден көзге түседі. Көкпар мен конкур спортына арналған алаңдарға арнайы кварц құмы төселіп, табиғи тастармен безендірілген. Сондықтан сөз жоқ әлемдік стандарттарға сай салынған ипподром мегаполистегі халықаралық дәрежедегі ұлттық ойын-сауық жарыстарын өткізетін үлкен спорт алаңына айналып отыр.
Өз кезегінде атшабардағы Ұлыстың ұлы күні «GREAT QAZAQ GAMES» яғни қазақтың ұлттық ойындарымен жалғасын тапты. Осы спорттық жарыста еліміздің барлық өңірінен және Түркия, Қытай, Моңғолия, Өзбекстан, Қырғызстан, Тәжікстан, Ресей, Сауд Арабиясы мен Иорданиядан келген спортшылар бақ сынасады. Олар 3 күн бойына көкпар, бәйге, қыз қуу, теңге ілу, аударыспақ, қазақ күресі, дәстүрлі садақ ату, жамбы ату, тоғызқұмалақ және өзге де ұлттық спорт түрлері бойынша жүлдеге таласады.
Мәселен, Түркиядан келген спортшы Энис Мустафа Юрдокок тоғыз жылдан бері жамбы атумен айналысады. Бұл спорт түріне деген махаббат досы Елдос Қазақстанға қонаққа шақырған сәттен басталыпты. Спортшының жасы – қазір 65-те. Бірақ соған қарамастан, өзін тың сезінеді және жеңіске деген құлшынысы басым. Қазақстаннан жүлдесіз қайтпаймын деп өзіне сенім білдіріп отыр. Қонаққа жаңадан ашылған ипподром ерекше ұнапты. Ат спортын дамытуға барлық жағдайдың жасалғанын көзбен көрген. Өзінің айтуынша, Түркияда да ұлттық спорт түрлеріне ерекше қамқорлық көрсетіледі. Мемлекет пен жеке азаматтар тарапынан ұлттық спорттың кең етек жаюына, ел ішінде насихатталуына ықылас жоғары. Түркиялық спортшының өзінің де жеке спорт клубы, мектебі бар екен. Ол сонда балаларды жаттықтырумен айналысады.
Сол секілді Муаз Аттамими өзінің серіктесі Абдулла Аттамимимен сонау Сауд Арабиясы жерінен садақ ату жарысынан қомақты жүлде алып кету үшін ат арытып келіп отыр. Жас спортшы Джидда қаласындағы университетте дінтану факультетінде оқиды. Алайда атқа міну, садақ тарту оның қолы бос кезде айналысатын сүйікті ісі екен. Оған көне замандағы батырлардың ізін жалғауға әкесі рухани демеу берген.