Бірнеше күн бұрын Тараз қаласындағы №22 мектептің мұғалімдері мен полиция инспекторы Әлішер Ермеков табиғи газдан уланған бүтін бір отбасыны құтқарып қалған болатын. Осыған орай Тараз қаласының әкімі Бақытжан Орынбеков бес адамнан құралған отбасыны құтқарған №22 мектептің мұғалімдерін қабылдап, құрмет көретті.
«Басын бәйгеге тігіп, айналасына көмектесуге құштар жандар қашанда мақтауға лайық. Түрлі оқыс оқиғада төнген қауіпке қарамастан, өзгенің өмірін құтқарып қалған азаматтарға айтар алғыс, көрсетілетін құрмет шексіз.
Мұндай ерлік екінің бірінің қолынан келмейді. Сіздер бейбіт күннің батырысыздар. Осы тәуекелдеріңіз арқылы тұтас ұстаз дейтін ұлы мамандықтың абыройын көтеріп, беделін биіктеттіңіздер. Осы ерліктеріңіз – өскелең ұрпаққа үлгі, мол тағылым. Баршаңызға батылдық пен қырағылықтарыңыз үшін алғыс білдіре отырып, дендеріңізге саулық, отбасыларыңызға амандық тілеймін», деген шаһар басшысы бейбіт күннің батырларына сый-сияпат тапсырды.
Естеріңізге сала кетсек, 6 наурыз күні №22 орта мектептің 2-сынып оқушысы Бекжан Бақытжанұлы сабаққа келмегендіктен, мектеп әкімшілігі ата-анасына хабарласқан. Алайда олардың да сол күні жұмысқа шықпағаны, №10 орта мектепте білім алатын сол отбасының 2 баласының да сабаққа бармағаны белгілі болады. Мектеп әкімшілігі мән-жайды анықтау мақсатында оқушылардың үйіне директордың тәрбие ісі жөніндегі орынбасары Эльмира Еселбаева, оқу-тәрбие ісі жөніндегі орынбасары Аида Есенаманова, дене шынықтыру пәнінің мұғалімі Қуаныш Исмаилов, мектеп полиция инспекторы Әлішер Ермековті жібереді.
Олар үйге барған соң терезеден қимылсыз жатқан 5 адамды байқайды. Сол арада бірден әрекетке көшіп, бесеуін де далаға алып шығып, газ құрылғысын өшіреді. Соның арқасында бір отбасы ажал тырнағынан аман қалды.
ТАРАЗ