Аралас жекпе-жектегі Азияның ең белді промоушені – «ONE Championship» өзінің кезекті жарысын 6 мамырда АҚШ-тың Брумфилд қаласында ұйымдастыруды көздеп отыр.
Аталған турнирде Қайрат Ахметов те өнер көрсетеді. Әр жеңісінен кейін «Қара жорға» билейтін қазақ жігітін жанкүйерлер жақсы біледі. 35 жастағы қандасымыз осы спорт түрін серік еткелі 13 жылға жуықтады. Сол аралықта 31 кездесу өткізіп, 29 жеңіске жетті. 18 қарсыласын есінен тандырды. 2015 жылы ол Бейжіңде бразилиялық Адриано Мораестен басым түсіп, аталған нұсқаның чемпиондық белбеуін иеленді. Арада екі жыл өткен соң дәл сол спортшыдан жеңіліп, атағынан айырылды. 2018 жылы филиппиндік Джехе Эустакиоға есе жіберді. Содан кейінгі бес кездесуде Ахметовтің үстемдігі еш күмән туғызған жоқ.
Қайраттың қарсыласы – Рис Макларен. 31 жастағы Аустралияның файтері октагонға 26 мәрте шығып, 16 рет жеңіске жетті. 13 бәсекені мерзімінен бұрын аяқтады. Бұл спортшылар осыдан төрт жыл бұрын күш сынасқан еді. Ол кезде Ахметов ұпай санымен жеңіс тойын тойлады.
АҚШ-тағы жарыстың басты жекпе-жегінде кезінде UFC-дің ең белді файтерлерінің бірі болған америкалық Деметриус Джонсон мен «ONE Championship» нұсқасының қазіргі чемпионы Адриано Мораес айқасады.