Туристі қазы-қартамен қызықтыра аламыз ба?

Жалпы, Қазақстанның кез келген аймағы өзінің әсем табиғаты­мен, көрікті жерлерімен туристерді тар­туға қауқарлы. Әр аймақтың немесе елдің өзіне тән табиғи ерекшелігі бола­тыны сияқты жер көлемі жағынан әлем­де тоғызыншы орын алатын біздің еліміздің де әр аймағы туризмнің кез келген саласын дамытуға мүмкін­дік береді. Әсіресе оңтүстік өңірде туризмнің барлық бағытын белсенді дамытуға болады. Атап айтқанда, ке­йінгі кездері туристер арасында ең көп сұранысқа ие болып жүрген емдік-сауықтыру, курортты, экологиялық, іскерлік, мәдени, тарихи, спорттық, агро және тағы басқа да туризмнің салаларын жандандыруға мүмкіндік бар. Бұл тізімге гастрономиялық туризмді де қосуға болады.

Иә, бүгінде шетелдік туристерді тек табиғаты әсем жерлермен ғана емес, ата-бабамыздан мирас болып қалған дәстүрлі ұлттық тағамдары­мыз арқылы да тарта аламыз. Жуырда гастрономиялық туризм бойынша Түркістан қаласында елімізде алғаш рет «Gastro Fest Turkistan – 2023» фестивалі ұйымдастырылды.

Түрленген Түркістан қаласының көрнекті белгісіне айналатын, өңір­дегі қоғамдық тамақтану саласын дамытуға және гастрономиялық брен­дін қалыптастыруға үлес қосу мақ­сатында және Наурыз мерекесіне орайластырып ұйымдастырылған гастро­фестиваль облыстық Туризм бас­қармасының «Open Turkistan» туристік ақпараттық орталығының қолдауымен кең көлемде аталып өтті.

Қаланың 30-ға жуық мейрамха­на­сы мен дәмханасы гастрофест қонақ­тарына ұлттық тағамдар, жергілікті ­деликатестер және стрит-фуд дәм­дерін, тәттілер мен сусындарын ұсын­ды. «Ұлы дала елі» орталығының айма­ғында өткен маңызды іс-шараға алыс-жақын шетелдерден және өзге де аймақтардан 10 мыңнан аса қонақ қатысты. Сонымен қатар іс-шараға жергілікті және Ресей, Өзбекстан, Қытай, Нидерландтан 100-ге жуық компания өкілдері келіп, іскерлік байланыстар орнатуға мүмкіндік алды.

«Көрме-жәрмеңке ауыл шаруа­шы­лығы мен тамақ өнеркәсібі өнім­дері мен қызметтерімен таныстыру және сату мақсатында өткізілді. Көр­ме-жәрмеңке аясында ауыл шаруа­шы­лығы мен тамақ өнеркәсібін дамыту саласындағы жаһандық тақы­рып­тарға арналған форум ұйым­дас­ты­рылды. Сонымен қатар іс-шара бары­сында түйелер шеруі, көкпар ойы­ны, этноқалашық, гастрофести­валь, концерттік бағдарламалар мен түрлі шоулар өтті. Бұған қоса спорт­тық бағдарламалар мен ұлттық ойындар, қасиетті орындар мен кесе­нелерді аралау және шығыс тағам­дарынан дәм тату, қолөнер шеберханаларымен танысу сияқты іс-шара­лар да бағдарламамызда болды. Бұл іс-шаралар жалпы туризм мен агро­туризм­нің дамуына оң ықпал етеді деп үміттенеміз. Сондай-ақ Наурыз мере­кесіне орай «Керуен сарай» кеше­нінде 30 киіз үй тігіліп, төл жаңа жы­лы­мыз­дың мән-маңызын тағы бір мәрте аша түс­кендей болдық», деді шараны ұйым­дастырушы, «ExpoGroup» компа­ниясының директоры Шолпан Қожабаева.

Түркістан облысы Ауыл шаруа­шылығы басқармасы басшысының орынбасары Нұржігіт Мырзахметов­тің айтуынша, бұл игі іс-шара енді жыл сайын тұрақты түрде Түркістан қаласында өткізіліп тұрмақ.

«Облысымыз еліміздегі аграрлы аймақтың қатарына жатады. Үш күнге жалғасқан көрме-жәрмеңкеде ауыл шаруашылығы мен тамақ өнеркәсібі бойынша 15-ке жуық меморандум жасалды. Сондай-ақ ауқымды іс-шарада үздік киіз үйлер мен жетіс­тіктер стендтеріне өңіраралық конкурстар ұйымдастырды. Аталған көр­ме-жәрмеңкеде отандық тауар өндіру­шілер мен сауда объектілері­нің тікелей өзара іс-қимылына ба­ғыт­талған «Қазақстанда жасалған» жалпыұлттық жобасы ұсынылды. Сонымен қатар облысымызда тұңғыш рет ұйымдастырылған ауқымды көр­ме демеушілердің қолдауымен өтке­нін айта кеткен жөн. Алдағы уақытта бұл игі дәстүр өз жалғасын тауып, жыл сайын ұйымдастырамыз деген ниеттеміз», дейді Түркістан облысы Ауыл шаруашылығы басқармасы бас­шысының орынбасары Нұржігіт Мырзахметов.