Тәжге талас қыза түсті

Шахматтан әлемнің «Алтын тәжі» үшін өтіп жатқан бәсекенің кез келген партиясы гроссмейс­терлер үшін аса маңызды екені белгілі. Бірақ, Астанадағы бәсекенің сегізінші партиясы екі шахматшы үшін шешуші кезең еді. Себебі егер бұл партияда Ян Непомнящий жеңіске жетер болса, екі ұпай басымдығымен жалпы есепте алға ұзап, чемпиондыққа тағы бір маңызды қадам жасайды. Ал Дин Лижэнь қарсыласынан басым түскен жағдайда таразы басы қайта теңесіп, жарыс одан әрі қыза түспек. Сондықтан бұл бәсекеде қытайлық шахматшы жеңіске жетуге, ресейлік гроссмейстер барынша жеңілмеуге тырысып бақты.  

Десе де, сегізінші партияда ақ тастармен ойнаған Дин матчты жақсы бастағанымен, кездесудің бел ортасынан асқанда қателікке бой алдырып, маңызды бір ұпайынан қағылды. Ал Ян қарсыласының мұндай «сыйлығын» өз пайдасына жаратып, кезекті жарты ұпайын қоржынға салды. Төрт жарым сағатқа жалғасқан сегізінші партия 45-жүрістен кейін тең есеппен өз мәресіне жетті.

Сегізінші раундтағы тартысты бәсекеден кейін екі ойыншы да тоғызыншы партияда қарқынын бәсеңдетіп, асқан сақтықпен ойнады. Екі шахматшы да бұл кезеңде тәуекелге барған жоқ. Непомнящий ақ тастармен ойнап, жалпы есепте алда тұрса да тосын қадам жасамады. Дин де әр жүрісін ұзақ ойлап, қарсыласына лайықты жа­уап қайтарып отырды. Нәтижесінде, шахматшылар бұл партияны алты сағатқа жуық ойнады. Бұл – әзірше Астанадағы бәсекеде тіркелген ең ұзақ партия. Мамандар пікірі бойынша, ойын тағдыры 50-жүрісте-ақ шешіліп қойған болса да, шахматшылар бір-біріне берілгісі келген жоқ. Сөйтіп, матч 82 жүріске дейін жалғасып, грос­смейстер­лер бұл жолы да ұпай бөлісуге мәжбүр болды.

Тоғызыншы партиядан кейін Непомнящий жалпы есептегі басымдығын сақтап қалды – 5:4. Кеше әлем чемпионы атағынан үміткерлер 10-партия­сын өткізсе, бүгін 11-раундта бақ сынайды.