Алматыда Халықтық Рада спикері Борис Коллар бастаған Словакия делегациясының қатысуымен осы елдің Құрметті консулдығы ашылды. Құрметті консул қызметіне Қазақстан іскер әйелдер қауымдастығының мүшесі, жасыл экономика саласындағы сарапшы Гүлмира Толғанбаева тағайындалды.
Ресми іс-шараға Парламент Мәжілісінің Халықаралық істер, қорғаныс және қауіпсіздік комитетінің төрағасы Айгүл Құспан және Сыртқы істер министрінің орынбасары Роман Василенко қатысты.
Салтанатты рәсімге қатысушыларға арнаған сөзінде Словакия Халықтық Рада спикері Б.Коллар Қазақстанның ірі қаржы, ғылыми, білім беру және туристік орталығы – Алматыда словак консулдығын ашудың маңызына тоқталды. Б.Коллардың айтуынша, Алматы және Алматы облысының Қазақстанның экономикалық орталығы ретіндегі рөлі айрықша. Консулдық Словакия азаматтарына қолдау көрсете отырып, екі елдің ынтымақтастығына және бизнес әріптестіктің дамуына ықпал етеді.
Өз кезегінде депутат Айгүл Құспан құрметті консулдықтың ашылуы Қазақстан мен Словакия арасындағы дипломатиялық қатынастардың орнағанына 30 жыл толуына орайластырылып отырғанын жеткізіп, бұл оқиға дәстүрлі достық байланыстарды нығайтудағы тағы бір маңызды қадам екеніне тоқталды.
Сыртқы істер министрінің орынбасары Р.Василенко консулдық мәдениет, ғылым, білім, экономика және өзара сауда салаларында Қазақстан-Словак ынтымақтастығын дамытуға және нығайтуға ықпал ететініне сенім білдірді.