Өскеменнің «Алтай» волейбол клубы Вьетнамның Виньфук қаласында жалауы желбіреген клубтар арасындағы Азия чемпионатын жеңіспен бастады.
2021 жылғы Азия чемпиондары құрлық додасының «В» тобында «Liaoning Donghua VC» (Қытай), «Diamond Food Fine-Chef Sport Club» (Таиланд), «Khuvsgul Erchim VC» (Моңғолия) және «Hip Hing VB Club» (Гонконг) командаларымен бірге сынға түсуде.
Юрий Панченко жаттықтыратын «Алтай» клубы біріншіліктегі алғашқы ойынын Таиландтың «Diamond Food Fine-Chef Sport Club» клубымен өткізіп, бес партияға жалғасқан бәсекеде 3:2 (21:25, 19:25, 25:22, 25:14, 15:11) есебімен жеңіске жетті. Өткен жылы Семейде ұйымдастырылған чемпионатта да «Алтай» дәл осы команданы топтық бәсекеде 3:0 есебімен тізе бүктірген еді.