Қайрат АХМЕТОВ: Мені «Қара жорға» рухтандырады

– Қайрат, жеңіс құтты болсын! Бет әлпетің мен көңіл күйіңе қарағанда, бұл жекпе-жекте жеңіске жету саған ай­тар­лықтай қиындық туғыз­ба­ған секілді ғой.

– Негізі Рис Макларен де осал спортшы емес. Ол ONE FC рей­тингінде төртінші орында тұр. Осыдан төрт жыл бұрын екеуміз Токиода «төбелескен» едік. Ол кезде мен ұпай санымен жеңдім. Бұл жолы да дәл солай болды. Бәсеке аяқталғаннан кейін Рис: «Осы жарысқа мен тыңғылықты даярланған едім. Тіпті таңның атысынан күннің батысына дейін жаттықтым десе де болады. Осы айқаста қалай да сені жеңуді мақсат тұттым. Бірақ қанша күш салсам да, көздеген мақсатыма қол жеткізе алмадым. Мойындаймын, сен менен әлдеқайда мықты екен­сің», деп ағынан жарылды. Қарсыласымның осы бір ауыз сөзі көңілімді кәдімгідей мар­қайтып тастады.

– Бұл жеңіс саған не берді? Енді титулдық айқасқа шы­ғасың ба?

– Иә, ендігі мақсатым – Де­метриус Джонсонды же­ңіп, атал­ған промоушеннің чем­пиондық белбеуін иелену. Әри­не, бұл жоспарды жүзеге асыру оңай болмайды. «Күшті тышқан» деген жанама есіммен октагонға шығып жүрген америкалық файтер кезінде UFC чемпионы болып қана қоймай, көптеген рекордтық көрсеткішке қол жеткізді. Аса жеңіл салмақтағы Джонсон өз атағын 11 мәрте сәтті қорғап, сол ұйымның ең бел­ді спортшысына айналды. Тіпті оны «тірі аңыз» десек те ешкім дауласа қоймайды. Де­метриус сынды мықтыны же­ңу былай тұрсын, онымен тең дәрежеде айқасудың өзі көп­теген файтер үшін асқақ арман. Бірақ мен бұл жекпе-жекке әзірмін. «Тышқанды» тізе бүк­тіру үшін айқас алаңында еш аянып қалмаймын.

– Көпшілік үшін Деметриус Джонсонның сингапурлық ұйым­ға келуінің өзі түсініксіз жайт. Қанша дегенмен ол әлем­нің ең белді промоушені – UFC-дің шоқжұлдызы еді ғой.

– Оған еш таңдануға болмайды. Бүгінгі таңда ONE FC керемет қарқынмен дамып келеді. Қазір бұл ұйым әлемде екінші орында. Әрбір жарысы үлкен шоуға айналып, спорт кешендерінде ине шаншар орын болмайды. Оны бүкіл Азия, күллі әлем қызыға тамашалайды. Қаражаты да UFC-ден еш кем емес. Ережесі мүлдем бөлек. Тіпті қатал десек те болады. Өйткені бұл жерде жатқан адамды аяқпен және төрттағандаған спортшыны тіземен тебуге рұқ­сат берілген. Қатысушылар мін­детті түрде гидротестен өте­ді. Яғни шамадан тыс артық салмақтан арылуға тыйым са­лынған. Әркім өзінің табиғи сал­мағында өнер көрсетуге тиіс. Өйткені спорттан кейін де өмір бар. Адамның ағзасы темір емес, тым көп салмақ қуатындар ертеңгі күні соның зардабын шегеді. Денсаулығын құртады. Осының барлығы ONE FC-де ойластырылған. Ешбір ұйымда ондай гидротест жоқ.

 Ал Джонсонға келер болсақ, ол UFC-дің барлық мықтыларын оңдырмай сабады. Аталған ұйым басшылығы «Күшті тышқанға» лайықты қарсылас таба алмай әбден әбігерге түсті. Иә, ке­зін­­де оның Брэд Пикет (2010 жы­лы), Доминик Крус (2011) және Генри Сехудо (2018) сынды спорт­шыларға есе жібергені рас. Бірақ ол төрешілердің ше­шімімен ғана жеңілді. Ал ONE FC-ге ауысқанда Деметриус өзі­нің спорттық мансабында ал­ғаш рет нокаутқа түсті. 2021 жылдың көктемінде бра­зи­лия­лық Адриано Мораес АҚШ-тың аты аңызға айналған фай­терін тіземен теуіп, есінен тан­дырды. Міне, осыдан-ақ ірге­тасы Сингапурде қаланған про­моушеннің деңгейі қандай еке­нін білуге болады.

– ONE FC-ге бара сала сен бірден чемпиондық белбеу үшін айқастың. Әдетте ор­таңқол промоушендердің өзінде чемпиондық атаққа таласу үшін бірнеше бәсеке өт­кі­зуге тиістісің. Осы орайда са­ған осындай айрықша құр­мет не үшін көрсетілді?

– Менің ұзақ жылдар бойы Данияр Қасқарауов жетекшілік ететін «Алаш Прайд» клубының сапында өнер көрсеткенімді жақсы білесіздер. Қалың жұрт­қа сол ұйымда танылдым. Син­гапурлық промоушеннің тарапынан ұсыныс түскенде мен бірден алғашқы жекпе-жегімде чемпиондық тәж үшін таласамын деген талап қойдым. Олай болмаған жағдайда бас тартуға бекіндім. Өйткені ол кезге дейін мен бірде-бір рет жеңілген емес едім. Біраз уақыт ойлана-тол­ғана келе олар келісім берді. Сөй­тіп, мен 2015 жылдың 21 қарашасында Бейжіңде өткен жа­рыстың басты жекпе-жегінде өнер көрсету құқығына ие болдым.

– Бейжіңдегі жарыста сен бразилиялық Адриано Мо­раесті жеңіп, алтын белбеуді ие­лендің. Сол кезде қандай се­зімде болдың?

– Сөз орайы келгенде, Қы­тайда оқитын қазақ студент­теріне зор алғысымды білдіргім келеді. Олар спорт кешенін лық толтырып, барынша қолдау көрсетті. Бұл жағдай мені ерекше рухтандырды. Бес раундқа созылған сайыста Мораесті ұпай санымен ұтып, чемпиондық тәжге қол жеткіздім. Сол кезде қуаныштан төбем көкке екі елі ғана жетпеді.

– Әлемдегі ең белді ұйым­дардың бірінің чемпиондық белбеуін таққаннан кейін ма­териалдық тұрғыдан да жағ­дайың жақсарған шығар. Құ­пия болмаса, қанша қара­жат алдың?

– Сол күнге дейін мен тиын-тебенге жұдырықтасып жүр­генмін. Сондықтан сол уа­қытта ONE FC-дің маған берген сыйақысы көп ақша болып кө­рінді. Қазір ойлап отырсам, олай емес екен. Тым аз гонорар алған екенмін. Барлығы да өзіміздің білімсіздігіміздің кесірі. Ол кезде не менеджерім, не промоутерім жоқ. ONE FC-ден келсімшарт келген бетте құжатты ағылшынша білетін бір досыма оқыттым. Ол бір шолып өтті де, бәрі дұрыс деді. Мен қол қойдым. Сөйтіп, болар-болмас сыйақы алдым.

– Араға екі жыл салып, Ма­каода өткен жарыста дәл сол Адриано Мораестен же­ңі­ліп, чемпиондық атақтан айы­рылдың. Сол жекпе-жекте не жетпеді деп ойлайсың?

– Отбасылық жағдайыма байланысты бір жарым жылдай үлкен спорттан қол үзіп қалдым. Сырқаттанған ұлымды емдету үшін бірнеше ай бойы отбасыммен бірге Таиландта тұруыма тура келді. Сол жақта ем-дом қабылдадық. Кезекті жарыстың өтуіне төрт-бес ай қалғанда ғана жаттығу залына бас сұқтым. Дұрыс даярлықтың болмауы салдарынан жеңіліс таптым.

– Сол күнге дейін 23 рет жекпе-жекке шығып, бар­лы­ғында жеңіске жеткен едің. Ал­ғаш рет жеңілістің кермек дәмін татқанда қандай күйде бол­дың?

– Алғашында қатты күйіндім. Бірақ халықтың қол­дауының арқасында еңсе тіктеп, қайта қа­тарға қосылдым.

– Шердогіңе қарасақ, күні бүгінге дейін 32 кездесу өт­кізіп, 30-да жеңіске жеткен екенсің. 18 бәсекені мер­зімі­нен бұрын аяқтадың. Бұл – өте тамаша көрсеткіш! Осы цифр­ларға қа­­рап, көңілің мар­қаятын шы­ғар?

– Мен рекордыма емес, осы күнге дейін осындай би­ік дәрежеде жүргеніме, өзім­ді әлемге таныта біліп, кіл мық­тылармен күш сынасып, елімнің туын биікте желбіреткеніме қуанамын. Бұл жағдай менің бойыма қуат, жүрегіме жылу береді.

– Әр жеңісіңнен кейін «Қа­ра жорға» билеуді жақсы бір дәстүрге айналдырып, қа­лың көрерменнің көңілін тап­тың. Бұл өзіңнің бастамаң ба, әлде басқа біреулер осындай ой тас­тады ма?

– Бұл идея «Алаш Прайдта» жүрген кезімде ойға келді. Бала кезімнен бірге өскен досым Қуат «Найман» Хамитов Тито Ортис есімді спортшыға қатты елік­теді. Содан ол әр жекпе-жек­ке күрекпен шығып, жеңген кезде қарсыласын «көміп тастауды» әдетке айналдырды. Маған да бір «фишка» табу керек болды. Содан мен қазақи киіммен шығып, «Қара жорға» билеуді жөн көрдім. Бұл әрекетімді жанкүйерлер жылы қабылдады. Сол кезден бері менің «фишкам» – «Қара жорға».

– Әңгімеңе көп рахмет, Қай­рат. «Күшті тышқанды» жеңіп, ONE FC-дің чемпиондық бел­беуін иеленуіңе тілектеспін.

– Сізге де көп рахмет. «Ege­men Qazaqstan»-ның оқыр­мандары әрдайым көп болсын!

Әңгімелескен

Ғалым СҮЛЕЙМЕН,

«Egemen Qazaqstan»