Футболдан Қазақстан ұлттық құрамасы келесі жылы Германияда жалауы желбірейтін Еуропа чемпионатының финалдық кезеңіне шығуға тағы бір маңызды қадам жасады. Бұл жолы Магомед Адиев шәкірттері сырт алаңда Сан-Марино құрамасымен кездесіп, қарсыластарының қақпасына жауапсыз үш гол соқты. Кезекті үш ұпайды қоржынға салған жерлестеріміз Н тобында алты ұпаймен Даниядан кейінгі екінші орынға көтерілді. Ал Еуропа біріншілігіне әр топта алғашқы екі орындағы құрамалар жолдама алатыны белгілі.
Италияның Парма қаласы Эннио Тардини стадионындағы кездесуде Қазақстан құрамасы осы іріктеу кезеңіндегі ең маңызды әрі ең қиын ойынын өткізді деп айтуға болады.
Италиядағы матчтың бірінші таймында жерлестеріміз қағаз жүзіндегі алаң қожайындарының қорғаныс кілтін таба алмай, біраз қара терге түсті. Оның үстіне бұл матчта Магомед Адиев бірқатар кадрлық қиындыққа тап болып, бір ғана шабуылшымен ойнауға мәжбүр болды. Ұлттық құраманың негізгі шабуылшысына айналған Абат Айымбетов Даниямен өткен ойындағы қызыл қағазының салдарынан бұл ойында әріптестеріне көмектесе алмады. Десе де шабуылшылардың орнын жоқтатпайтын қорғаушыларымыз Эннио Тардини стадионындағы матчта да мергендігімен көзге түсті. Ойынның 37-минутында Ян Вороговский есеп ашып, ел құрамасын есепте алға шығарды.
Екінші таймда Магомед Адиев алаңға Бақтиер Зайнутдинов, Эльхан Астанов, Арман Кеңесов секілді жас әрі креативті ойыншыларды шығарып, бірінші таймдағы сүреңсіз ойынды жандандыра түсті. Сөйтіп, жерлестеріміз матч аяқталғанға дейін тағы екі гол соғып, ойындағы басымдығын ұлғайтты. Алдымен 64-минутта команда капитаны Асхат Тағыберген пенальтиден мүлт кетпесе, матчтың соңғы секундында ұлттық құраманың көшбасшысы Бақтиер Зайнутдинов дәлдік танытып, кездесудің нүктесін қойды. Осы голының арқасында Зайнутдинов ұлттық құрамада соққан голдар санын 12-ге жеткізіп, әйгілі шабуылшы Виктор Зубаревпен теңесті.
Осылайша, Еуропа чемпионатының іріктеу кезеңіндегі үш ойында алты ұпай жинаған жерлестеріміз турнир кестесінде екінші орынға көтерілді. Бірақ қуануға әлі ерте. Өйткені Н тобында Дания мен Қазақстаннан бөлек, Финляндия мен Словения құрамасының еншісінде де үш ойыннан кейін алты ұпай бар. Бұл дегеніміз, бір топтағы төрт құраманың да жолдамадан үміті бар.
Топтағы өзге ойындарға тоқталар болсақ, үшінші турда Дания құрамасы өз алаңында Солтүстік Ирландияны қабылдап, 1:0 есебімен жеңіске жетсе, Финляндия футболшылары Словенияны тізе бүктірді – 2:0. Төртінші турда Адиев шәкірттері Белфастта Солтүстік Ирландиямен кездеседі. Бұл ойын маусымның 19-нан 20-на қараған түні өтеді. Сонымен қатар төртінші турда Дания Словенияға қонаққа барса, Финляндия өз алаңында Сан-Мариноны қабылдайды.