Теннистен жұптық сындағы еліміздің бірінші ракеткашысы Александр Недовесов Ұлыбританияда ұйымдастырылған «Челленджер» турнирінде жеңіске жетті. Бұл – 36 жастағы отандасымыздың биыл жеңіп алған алғашқы титулы.
Тұманды Альбионда өткен теннисшілер бәсекесінде жерлесіміз Эквадор өкілі Гонсало Эскобармен жұп құрап, финалда америкалық және аустралиялық Роберт Гэллоуэй мен Джон Патрик Смитпен шеберлік байқасты. 1 сағат 31 минутқа жалғасқан матчта Александр мен Гонсало қарсыластарынан үш сетте 2:6, 7:5, 11:9 есебімен басым түсіп, халықаралық турнирдің бас жүлдесін жеңіп алды.
Бұған дейін Александр Недовесов АТР 250 санатындағы екі жарыстың финалына шығып, екеуінде де жолы болмаған еді. Осыдан бір апта бұрын ол дәл осы Эскобармен Нидерландта жалауы желбіреген АТР 250 додасында екінші орынға ие болған болса, сәуір айында португалиялық Франциско Кабралмен бірге Босния және Герцеговинадағы жарыстың финалында қарсыластарына жол берген еді.
Сондай-ақ кеше кешкісін жекелей сындағы еліміздің ерлер арасындағы бірінші ракеткасы Александр Бублик Германияның Галле қаласындағы ATP-500 турнирінің финалында әлемдік рейтингте үшінші орында тұрған ресейлік Андрей Рублёвпен бас жүлдені сарапқа салды.