Қол добының үздіктері

Спортты дамыту дирекциясының мәлі­метінше, қол добы бойынша бәсекелер шешуші турға дейін тартысты өткен. Мәсе­лен, соңғы тур алдында бірден 3 команда – Қарағанды, Ақтөбе мен Шымкент ганд­бол­шылары бас жүлдеден дәмелі болды. Бесінші турда жарыс қожайындары Астана қаласының командасымен шеберлік бай­қасып, 38:30 нәтижесімен жеңіске жетті. Сөйтіп, кеншілер командасы ұпай санын 8-ге жеткізсе, Шымкент қаласының командасы Ақтөбе облысымен өткен аса тартысты матчта 33:22 есебімен басым түсіп, олар да 8 ұпайдан жинады. Жарыс соңында төрешілер жеңімпаз бен жүлдегерлерді доп айырмашылығы бойынша анықтады. Бес турда ең көп гол соғып, өз қақпасына аз гол өт­кізген Қарағанды облысының командасы спартакиада жеңімпазы атанса (57-53), Шымкент қаласы күміс (56-55), Ақтөбе облысы (51-56) қола медальға ие болды.

«Осыдан төрт жыл бұрынғы V жазғы спартакиада да Қарағанды қаласында өт­кен болатын. Сол кезде 4 команданың арасында (Қарағанды, Астана, Павлодар мен Атырау) кеншілер қаласының өкілдері чемпион атанған. Астана қаласы күміс, Пав­лодар облысы қола медаль алған. Биылғы жарыстың деңгейі көтерілген. Соңғы турда 3 команда бірдей ұпай жинап, тең түсуі соның көрсеткіші», деді Астана қаласы коман­дасының бапкері Владимир Березин.

Небәрі екі ойында жеңіске жеткен елорда­лықтар бұл жолы 4-орынмен шектелді. Жазғы спартакиадаға қатысып жатқан жаңа облыстың бірі Алматы – 5-ші, ал Маңғыстау облысы 6-сатыдан көрінді.

«Біз бүгін қола медальды місе тұттық. Қалағанымыз бас жүлде еді. Бүгін Шымкент қаласымен нашар ойнадық. Әсіресе алғаш­қы айналымда. Тым көп гол өткізіп алған соң айырмашылық көбейіп кетті. Неге бұлай болғанын білмеймін. Демек, әлі да­йындықты күшейтіп, тағы жұмыс істеу керек. Енді ұлттық құрамамен Азия ойындарына дайындық күтіп тұр. Құраманың жуырда жа­сақталғанына қарамастан, жақсы нәтиже көр­сетуге барымызды саламыз», деді ұлттық құрама қақпашысы Асылхан Набиев.

Қазақстан ерлер құрамасы алда Қытай­дағы Азия ойындары мен Қатар астанасында өтетін Париж Олимпиадасының іріктеу турниріне қатысады.