Есілдің жағасынан бой көтерген еңселі елордамыздың 25 жылдығына орай Өскемендегі облыстық Пушкин атындағы кітапханада «Астанаңды бейнеле» атты балалар көрмесі өтті.
Өскеменде өнерлі балаларды баулитын ондаған сурет үйірмесі бар. Соның бірі – «Жұлдыз» өнер мектебі. Аталған мектеп оқушылары Астана күніне орай өтетін көрмеге апта бұрын дайындала бастаған. Оқушылардың бірі Астана қаласындағы көрікті ғимараттарды бейнелесе, енді бірі қиялға ерік берген.
– Кітапханамыз қай мерекені болсын, ерекше дайындықпен өткізеді. Бүгінгі мерекелік бағдарламада сурет көрмесі де ұйымдастырылып отыр. Бұған біз «Жұлдыз» өнер мектебінің оқушыларымен қатар «Горный реучей» сурет үйірмесінің қылқалам шеберлерін тарттық. Көрмеге қойылған жұмыстары терең мағынаға ие. Астана күніне орай өткізіліп жатқан кітапхана фойесіндегі бұл көрме бір аптаға созылады, – дейді кітапхана қызметкері Назгүл Қыдырова.
Иә, Астана – халқымызды біріктірген отанымыздың жүрегі және ұлт мақтанышы. Соны көре білген кішкентай суретшілер қылқалам, қарындаштың көмегімен ел астанасына деген сүйіспеншіліктерін және әсем қаладан алған әсерлерін суреттер арқылы бейнелеген. Суретшілердің бірі Астана әлі де қарыштай дами түседі дегенді меңзесе керек, ғарыш кеңістігін бейнелеген. Қарап тұрсақ, балалардың қиялы ұшқыр, сезімі таза. Айта кетерлігі, дәл осындай көрме облыстың өзге де кітапханаларында өтіп жатты.
Шығыс Қазақстан облысы