Шу ауданына қарасты Өндіріс ауылының тұрғындары елді мекенге жаңа мәдениет үйі керектігін жиі айтып жүретін. Ауыл жұртшылығын алаңдатқан мәселе «Ауыл – ел бесігі» жобасы аясында шешімін тапты. Мәдениет үйінің ашылу салтанатына өңір басшысы Нұржан Нұржігітов арнайы қатысып, жергілікті халықтың қуанышына ортақтасты.
Деректерге зер салсақ, жобалық құны 256,9 миллион теңгені құраған жаңа ғимараттың құрылыс жұмысын «Тараз Инвест Құрылыс» ЖШС жүргізіпті. Ал мәдениет үйі 100 орынға арналған. Заманауи үлгіде салынған жаңа мекемені аралап көрген жергілікті жұрт бірер жыл бойы айтылған басты мәселенің оңынан шешілгеніне дән риза.
«Мемлекеттің өркендеуі жолында мәдениет пен өнер саласының алатын рөлі зор. Өйткені – мәдениет өнер мәйегі. Сондықтан ұлттық құндылықтарымыз бен дәстүрімізді, бабалардан мирас болып қалған өнерімізді өрге шығарамыз десек, мәдениет саласын дамытуға айрықша ден қойғанымыз абзал. Бүгінгі таңда өңірімізде 500-ден аса мәдениет нысаны халыққа қызмет көрсетіп отыр. Соңғы жылдары өңіріміздің мәдени-рухани өмірінде айтарлықтай өзгеріс бар. Маңызы зор нысандар дер кезінде салынып, пайдалануға беріліп жатыр. Бастысы бой көтерген ғимараттарда еңбек ететін азаматтар жергілікті халықпен біте қайнасып, елдің ертеңі үшін аянбай жұмыс істеуі керек», деді өңір басшысы.
Өңірде өткен жылы 4 нысанның құрылысы қолға алынса, 32 мәдени нысанға күрделі және ағымдағы жөндеу жұмыстары жүргізілген. Ал осы жылы 18 мәдени нысанның құрылысын жүргізу үшін қазынадан қаражат қарастырылған. Оның 9-ы жыл соңына дейін пайдалануға берілмек.
Жамбыл облысы,
Шу ауданы