Тауға шығудың да мәдениеті бар. Қазір өңірде туризмге барынша көңіл бөлініп келеді. Осы ретте Бұрқанбұлаққа бауыр басып, Шаған шыңына шығуға асыққан жастардың саны арта түсті. Олардан үлкендер де қалысар емес. Күні кеше Көксу ауданына қарасты Ақтекше ауылында «Адалдық шыңында бол!» ұранымен республикалық «Шаған тау – 2023» марафоны өтті.
Спорттық іс-шара таңғы жаттығумен басталды. Әр аймақтан келген спортшылар дене қыздырып, бәсекеге белсене дайындалды. Әрқайсысы «жеңіске жетем» деген үміттің жетегінде жігерленді.
Жарысқа өңірдегі белсенді жастар, спортшылар, әуесқой жеңіл атлеттер, облыс тұрғындары мен қонақтары қатысты. Олар 18-ден жоғары және 40-тан жоғары жас санаттары бойынша бақ сынасты.
Игі істің өтуіне мұрындық болған Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Жетісу облысы бойынша департаменті, облыстық қоғамдық даму басқармасы, Көксу ауданының әкімдігі, «Jetіsý jastary» КММ-ның филиалы «Koksý jastary».
Тау жарысын ұйымдастырудағы басты мақсат – жастардың бойында адалдық пен сенімділікті, парасаттылық пен сыбайлас жемқорлыққа мүлде төзбеушілікті қалыптастыру. Сонымен қатар Жетісу облысының тұрғындары мен қонақтарын саламатты өмір салтына ынталандыру.
Бұл додаға барлығы 150-ден аса адам қатысты. Нәтижесінде, 13 шақырым қашықтық бойынша ерлер арасында бірінші болып мәре сызығын Аман Нұркелді, екінші болып Айбол Омар кесті. Үшінші орын Есенбол Жаңабекке бұйырды. Ал әйелдер арасында бірінші орынды Айжан Рахман, екінші орынды Жанлин Ростовецкая еншіледі.
6,5 шақырым қашықтыққа жүгіруде ерлер арасында жеңімпаз Данияр Орманғали атанды. Екінші орын Ислам Аманғосқа, үшінші орын Әкім Еркебайға бұйырды. Ал әйелдер арасында Ақбаян Нұрмаммет бірінші келді. Мәреге екінші болып Жұлдыз Ахметова жетті. Үшінші орынды Файруза Атшабарова алды.
6,5 шақырым қашықтық бойынша 40-тан жоғары жас санаты арасында бірінші орынды Ержан Жанмаилов жеңіп алса, екінші орынды Асқар Қожанов еншіледі. Үшінші орын Сұңғат Қайыртаевқа бұйырды. Жеңімпаздар мен жүлдегерлер Алғысхатпен және қаржылай сыйлықтармен марапатталды.
Жетісу облысы