Іріктеуді сәтті бастады

Келесі жылы Өзбекстанның бас шаһары – Ташкентте жалауы желбірейтін әлем чем­пио­натының іріктеу кезе­ңін Қазақстан құрамасы екінші ай­­налымнан бастады. Ол ке­зеңде Рикарда Кака шәкірт­тері Словения және Черно­гория құрамаларымен бақ сынасып, өз тобында бірінші орын­мен элиталы кезеңде ойнау мүмкіндігіне ие болды. Ал әлем чемпионатына жол­дама беретін соңғы ірік­теуде жерлестеріміз жеребе қо­рытындысы бойынша Ни­дер­ланд, Румыния және Әзер­байжан құрамаларымен бірге А тобына түсті.

Өткен аптада ел құ­рамасы соңғы іріктеу саты­сындағы алғашқы ойынын сырт алаңда өткізіп, Нидерланд фут­зал­шыларынан басым түс­ті. Ал­мере қаласында өткен тартыс­ты ойында Қазақстан құ­рамасы әр таймда бір-бір голдан соғып, іріктеудегі ма­­ңызды үш ұпайына қол жет­кізді. Алғашқы таймда Эдсон есепті ашса, екінші тайм­да Дәу­рен Тұрсағұлов таб­лодағы көр­сеткішті еселеп, ойынның нүктесін қойды – 2:0.

Статистикаға көз жүгір­тер болсақ, Қазақстан мен Ни­дерланд құрамалары бұ­ған дейін тек бір мәрте кез­дескен екен. 2019 жылы әлем чемпионатының екінші ірік­теу кезеңінде жолдары түйі­сіп, сол кезде де Қазақстан құ­­ра­­масының мерейі үстем болған еді – 5:0.

Біздің топтағы екінші ойында Румыния құрамасы өз алаңында Әзербайжан футзалшыларын қабылдап, 3:1 есебімен жеңіске жетті. Сөйтіп, бірінші турдан кейін А тобында Қазақстан мен Румыния құрамалары үш ұпаймен көш басына шықты. Алайда румындар көп гол соғу көрсеткішімен турнир кестесінде Қазақстанды екінші орынға ығыстырды. Енді А тобының қос мық­тысы 20 қыркүйек күні Ал­матыдағы Балуан Шолақ спорт кешенінде шеберлік байқасады. Демек элиталық раундтың екінші турынан кейін А тобында жалғыз көш­басшы пайда болуы мүмкін.

Іріктеу сайыстарының ере­жесі бойынша элиталы кезеңде бақ сынап жатқан Еуропаның 20 құрамасының тек жетеуі ғана келесі жылғы әлем чемпионатына қатыса алады. Яғни бес топта үз­дік шыққан бес құрама жа­һандық додаға тікелей жол­дама алса, екінші орын ал­ған ең үздік төрт құрама бір-бі­рімен елек­тік ойын өткі­зіп, қалған екі жолдаманы са­рапқа салады.