Қазақстанның әр өңірінде еркін күрестің үйірмелері бар. Сол жерлерден жыл сайын жүздеген түлек түлеп ұшады. Бірақ осы күнге дейін спорттың осы түрінен біздің елден бірде-бір әлем чемпионы шықпаған еді. Бұл жағдай жергілікті жанкүйерлердің көңіліне селкеу түсірді. Сол олқылықтың орны кеше толды. Сербияның астанасы – Белградта өтіп жатқан әлем чемпионатында Ризабек Айтмұхан барлық қарсыласын қоғадай жапырып, төрткүл дүниенің теңдессіз балуаны деп танылды.
92 кило салмақ дәрежесінде күш сынасқан Ризабек Айтмұхан алғашқы айналымдарда мажарстандық Балхаш Юхас (13:3) пен Еуропаның екі дүркін чемпионы, түркиялық Фейзоллах Актюрктің (11:0) тас-талқанын шығарса, жартылай финалда былтырғы әлем және құрлық чемпионаттарының қола жүлдегері грузиялық Мириан Майсурадзені (8:1) атойлап жеңді. Финалда қандасымыз әлем чемпионатының екі және Еуропа чемпионатының үш дүркін жүлдегері әзербайжандық Осман Нурмагомедовпен айқасты. Өте тарысты өткен бәсекеде 5:2 есебімен Ризабек жеңіске жетті. Сөйтіп, ол Қазақстанның еркін күрес тарихындағы тұңғыш әлем чемпионы атанды. Балуанды тарихи жеңісімен Мемлекет басшысы Қасым-Жомарт Тоқаев құттықтады. Ал финалдық сайыстан кейін Ризабектің өзі «Бұл табыс маған ерең еңбектің арқасында келді. Мені әкем күнде сағат таңғы 6:00 немесе 6:30-да оятып, жаттығу жасататын. Кейіннен спорт мектебіне берді. Соның бәрі еш кеткен жоқ. Міне, бүгін мен Алланың қалауымен әлемдік додада топ жардым», деп ақтарыла сөйледі.
Өкінішке қарай, Мейрамбек Қартбай (57 кило) қола медаль үшін белдесуде армениялық Арсен Харутюняннан ұтылса, жолдама үшін тартыста ресейлік Заур Угуевқа есе жіберді. Нұрқожа Қайпанов (74 кило) жұбаныш белдесуінде жапониялық Даити Такатаниге жол берді. Сол секілді Болат Сақаев та (79 кило) жүлдегерлер қатарына қосыла алмады.
Жоғарыда аталған салмақ дәрежелері бойынша мына балуандар жүлделі орындарды иеленді: 57 кило: 1. Стеван Мичич (Сербия), 2. Рей Хигучи (Жапония), 3. Арсен Арутюнян (Армения) мен Зелимхан Абакаров (Албания). 74 кило: Заурбек Сидаков (Ресей), 2. Кайл Дейк (АҚШ), 3. Хетаг Цаболов (Сербия) пен Даичи Такатани (Жапония). 79 кило: Ахмед Усманов (Ресей), 2. Владимир Гамкрелидзе (Грузия), 3. Мухаммад Ноходи (Иран) мен Василий Михайлов (Украина) және 92 кило: 1. Ризабек Айтмұхан (Қазақстан), 2. Осман Нурмагомедов (Әзербайжан), 3. Файзоллах Актюрк (Түркия) пен Захид Веленсия (АҚШ).
Кеше еркін күрестен ең соңғы жүлделер сарапқа салынды. 65 кило салмақтың жартылай финалында Рахман Амузадхалили (Иран) мен Исмаил Мусукаев (Мажарстан), Вазген Теванян (Армения) мен Себастьян Ривера (Пуэрто-Рико), 97 кило салмақта Гиви Мачарашвили (Грузия) мен Магомедхан Магомедов (Әзербайжан) күрессе, Ресейдің атақты балуаны, екі дүркін Олимпиада және бес дүркін әлем чемпионы Абдулрашид Садулаев жарақатына байланысты бахрейндік Ахмед Тажудиновке жол берді. Өкінішке қарай, бұл межеге еліміздің бірде-бір спортшысы жете алмады.
Сондай-ақ кеше әйелдер күресінен белдесулер басталды.